Qadın sərnişin mübahisə etdiyi taksi sürücüsünün başını yardı - VİDEO

İstanbulun Beyoğlu rayonundan Kartal istiqamətinə gedən taksidə dava baş verib.

Sonxeber.az türk mediasına istinadən xəbər verir ki, qadın sərnişin sürücünün yolu qəsdən uzadaraq artıq pul almağa çalışdığını deyib və bu səbəbdən onu döyüb. Hadisə anı avtomobilin daxili kamerası tərəfindən saniyə-saniyə qeydə alınıb.

Məlumata görə, Beyoğlundan taksiyə minən qadın Atalar məhəlləsinə getmək istəyib. O, taksi sürücüsü İbrahim K.-nın qəsdən daha uzaq yol seçdiyini iddia edib. Sürücü isə naviqator vasitəsilə hərəkət etdiyini və Göztepe körpüsündə aparılan yol işlərinə görə alternativ yola yönəldiyini bildirib.

Mənzilə çatdıqdan sonra qadın yol haqqını tam ödəməyib, bu da tərəflər arasında mübahisəyə səbəb olub. Sürücü pulu tam istəyəndə, qadın mobil telefonla onun başına zərbə endirib. Daha sonra qadın polis çağıraraq maşından düşüb, amma sürücü ondan polis gələnə qədər gözləməsini istəyib. Qadın uzaqlaşarkən sürücünün onu telefona çəkdiyini görüb və yenidən onun başına vurub.

Taksidə baş verən mübahisə və zorakılıq anı avtomobilin təhlükəsizlik kamerasına düşüb.

Hadisədən sonra sürücü İbrahim K. açıqlama verərək bildirib:

"Navigasiya ilə hərəkət edirdim, Göztepe körpüsündə yol bağlı idi, yolu dəyişməli oldum. Yol təxminən 1,2 kilometr uzandı. Üstəlik, tətbiqdən çağırış üçün 50 lirə fərq tutulur, körpü keçidi haqqı da borca əlavə olunur."

Sürücü, qadın tərəfindən döyüldüyünü və başından yaralandığını, Kartal Dövlət Xəstəxanasına aparıldığını, başında 3 tikiş vurulduğunu deyib:

"Şahidlərim var. Xəstəxanadan aldığım darp hesabatı ilə polisə müraciət etmişəm və şikayətçi olmuşam."

Hadisə ilə bağlı istintaq davam edir.

Telegramda izləyin