70 yaşlı kişi ayı hücumuna məruz qaldı

Türkiyədə, Ağrının Doğubayazıt rayonunun Yukarı Güngören kəndində qoyun otaran 70 yaşlı Halit Zengel ayının hücumuna məruz qalıb.

Sonxeber.az türk mediasına istinadən xəbər verir ki, ayının pəncə zərbəsi nəticəsində Zengelin yanaq (alma) sümüyü qopub və o, ağır vəziyyətdə xəstəxanaya çatdırılıb.

Hadisə şənbə günü günorta saatlarında baş verib. Ağaclıq ərazidən çıxan ayı qəfildən Zengelə hücum edərək onun sifətinə pəncə ilə zərbələr endirib. Yaralanan Zengel telefonla oğluna zəng edərək kömək istəyib. O, təcili tibbi yardım maşını ilə Doğubayazıt Dövlət Xəstəxanasına aparılıb, daha sonra isə Erzurum Atatürk Universiteti Araşdırma Xəstəxanasının Çənə Cərrahiyyəsi şöbəsinə göndərilib.

Müayinədə Zengelin yanaq sümüyünün qopduğu və üz sümüklərində ciddi zədələnmələr olduğu müəyyən edilib. O, Prof. Dr. Ümit Ertaş tərəfindən dərhal əməliyyata alınıb.

Prof. Dr. Ümit Ertaş xəstənin vəziyyəti haqqında bunları bildirib:

"Ayının pəncə zərbəsi ilə yanaq sümüyü qopmuş, üzündəki bəzi sümüklər zədələnmişdi. Əməliyyatla sümükləri yerinə qoyduq və toxuma bərpasını etdik. Hazırda xəstəmizin vəziyyəti yaxşıdır. Üç günlük infeksiya nəzarətindən sonra evə buraxılacaq. Gətiriləndə üzündə ayının dırnaq izləri səbəbilə böyük kəsiklər və yırtıqlar vardı, biz bunların hamısını düzgün şəkildə təmir etdik. Üz sinirində zədə yoxdur, bu da böyük şansdır. Xəstə hər hansı bir estetik və funksional problem yaşamayacaq".

Həkimlərin sözlərinə görə, Halit Zengel tam sağaldıqdan sonra əvvəlki görünüşünə qayıdacaq.

Telegramda izləyin