Toyda düşən davada gəlinin əmisi öldü - VİDEO

Diyarbakırın Kayapınar rayonunda yerləşən toy salonunun qarşısında baş verən silahlı insident faciə ilə nəticələnib.

Sonxeber.az türk mediasına istinadən xəbər verir ki, hadisə axşam saatlarında Fırat məhəlləsindəki toy salonunun qarşısında yaşanıb. Toya gələn qonaqlar arasında naməlum səbəbdən başlayan mübahisə qısa müddətdə silahlı qarşıdurmaya çevrilib. Atəş səsləri qonaqlar arasında böyük təşvişə səbəb olub. Davada gəlinin əmisi Hasan Demir həyatını itirib, 3 nəfər isə yaralanıb.

Məlumat daxil olduqdan sonra əraziyə təcili tibbi yardım və polis qüvvələri göndərilib. Yaralılardan birinin vəziyyətinin ağır olduğu bildirilib. Hadisə ilə əlaqədar bir neçə şəxs saxlanılıb və cinayət işi üzrə istintaq başlanılıb.

Hadisə anı mobil telefon kamerası ilə də qeydə alınıb. Görüntülərdə əlində tapança olan bir şəxsin tərəflərə doğru qaçaraq ardıcıl şəkildə atəş açdığı, güllələrə tuş gələn bir şəxsin isə yerə yıxıldığı görünür. Şübhəlinin daha sonra hadisə yerindən qaçdığı qeyd olunur. Araşdırmalar davam edir.

Telegramda izləyin