Qazaxıstan etirazını bildirdi: Ukraynadan tədbir görülməsini gözləyir

Qazaxıstanın Xarici İşlər Nazirliyi (XİN) Xəzər Boru Kəməri Konsorsiumunun infrastrukturuna edilən hücumla bağlı etirazını bildirib.

Oxu.Az TASS-a istinadən xəbər verir ki, bu barədə məlumat nazirliyin rəsmi nümayəndəsi Aybek Smadiyarovun bəyanatında yer alıb.

"Qazaxıstan Xarici İşlər Nazirliyi Beynəlxalq Xəzər Boru Kəməri Konsorsiumunun Novorossiysk dəniz limanı akvatoriyasında yerləşən kritik infrastrukturuna növbəti məqsədyönlü hücumla əlaqədar etirazını bildirir", - deyə bəyanatda qeyd olunur.

Həmçinin vurğulanır ki, bu, beynəlxalq hüquq normaları ilə fəaliyyəti təmin olunan mülki obyektə qarşı artıq üçüncü təcavüz aktıdır.

XİN həmçinin qeyd edib ki, hücumu Astananın Kiyevlə münasibətlərinə zərər vuran bir addım kimi qiymətləndirir və Ukrayna tərəfindən bu kimi insidentlərin təkrarlanmamasına dair kəsərli tədbirlər gözləyir.

Xatırladaq ki, noyabrın 29-da pilotsuz katerlərin hücumu nəticəsində Xəzər Boru Kəməri Konsorsiumunun yanalma qurğularından biri əhəmiyyətli dərəcədə zədələnib.

Telegramda izləyin