Luvr Muzeyinə su sızdı: Təxminən 400 nadir kitab zərər gördü

Fransanın paytaxtı Parisdə yerləşən dünyaca məşhur Luvr Muzeyi bu dəfə baxımsızlıq qalmaqalı ilə gündəmə gəlib.

Sonxeber.az türk mediasına istinadən xəbər verir ki, uzun illərdir problemi olduğu bilinən su xəttində baş verən sızma nəticəsində muzeyin Misir antik əsərləri bölməsinə aid kitabxanasında təxminən 400 nadir kitab zərər görüb.

Luvr Muzeyinin baş direktor müavini Fransis Ştaynbok bildirib ki, sızma kitabxananın üç otağından birini əhatə edib və həmin bölmədə 300-400 arasında nadir əsər saxlanılır. O, araşdırmaların davam etdiyini deyərək, zərər görən kitabların arasında "çox qiymətli" nümunələrin olmadığını iddia edib.

Lakin muzey əməkdaşları və ekspertlər uzun müddətdir məlum olan texniki problemlərin hələ də həll edilməməsinə sərt reaksiya veriblər. Ştaynbokun təmir və bərpa işlərinin yalnız 2026-cı ilin sentyabrında planlaşdırıldığını etiraf etməsi narazılığı daha da artırıb.

Hər gün minlərlə ziyarətçini qəbul edən və təxminən 35 min əsərin sərgiləndiyi Luvr Muzeyində 19 oktyabrda da səs-küylü oğurluq hadisəsi baş vermişdi. Səhər saatlarında muzeyin xaricindəki yük maşınının liftindən istifadə edən kimliyi müəyyən edilməmiş 4 nəfər bir pəncərəni sındıraraq Krallıq zinət əşyalarının sərgiləndiyi "Apollo Qalereyası"na daxil olmuşdu. Oğrular ümumi dəyəri 88 milyon avro olan 9 ədəd zinət əşyasını götürmüş, qaçarkən III Napoleonun həyat yoldaşı İmperatriçə Eugeniyə məxsus tacı yerə salmışdılar. Tac zədələnmiş halda muzeyin yaxınlığında tapılmışdı.

Cəmi 7 dəqiqə davam edən oğurluqdan sonra şübhəlilər motosikletlərlə hadisə yerindən uzaqlaşmışdı. Hadisənin ardınca muzey təhlükəsizlik səbəbi ilə müvəqqəti bağlanmış və araşdırmalar tamamlandıqdan sonra 3 gün sonra yenidən ziyarətçilər üçün açılmışdı. Polis hadisə ilə bağlı 4 nəfəri saxlamışdı.

Telegramda izləyin