Operada yaş qalmaqalı: "Leyli"dən narazılara cavab

Xalq artisti Mənsum İbrahimov və Nəzakət Teymurovanın "Leyli və Məcnun" tamaşasında baş rol alması yenidən sosial şəbəkə izləyiciləri tərəfindən narazılıqla qarşılanıb. İzləyicilər adıgedən obrazın hər iki sənətkarın yaşına uyğun gəlmədiyini bildirib.

Tamaşa 2026-cı ilin yanvar ayının 12-də oynanılacaq. Hafiz Quliyevin quruluşunda olan bu tamaşa Heydər Əliyev Sarayında baş tutacaq.

Bəs, bu iradlara həmin obrazı yaradacaq sənətkarların özü nə deyir?

Xalq artisti Nəzakət Teymurova Qaynarinfo-ya açıqlamasında bu təbliğatın arxasında müəyyən insanların olduğunu bildirib:

"Tamaşanı 12 yanvarda oynayacağıq. Hər kəsi gözləyirik. Əsas forma və səsdir. Səsiniz yerindədir, oynaya bilərik. Biz neynəyə bilərik, indiki gənclərimiz oxumaqdan qaçır. Ona görə də bu yaşda oxuyanları alqışlamaq lazımdır. Biletlərimiz də satılır. Əgər tamaşaya bilet satılırsa, deməli, bizə tələbat var. Kim nə istəyir yazsın. Biz ikimiz də Opera və Balet Teatrında işləyirik, oradan məvacib alırıq. Sentyabr-oktyabr aylarında səhnə gənclərin ixtiyarındadır. Bu tamaşada baş rolları onlar oynayır. Etiraza gəlincə, bu elə-belə deyil, arxasında müəyyən insanlar var. Onların sifarişi ilə yazılır".

Nəzakət Teymurova bu kampaniyanın arxasında kimlərin olduğunu bilmədiklərini əlavə edib:

"Dedi-qodu lazım deyil, gəlsin, baxsın tamaşaya, görüm ondan sonra etiraz edəcəkmi? Bu tamaşanı illərdir oynayırıq. Bizim başqalarından bir fərqimiz var? Tamaşamıza bilet tapılmır. Sənətkar üçün əsas budur. Teatrın da bütün gəncləri baş rolda oynayır. Bizə qarşı bu kampaniyanı aparan həmkarlarıma üzümü tutub deyirəm, arzu edirəm, siz də bizim kimi 65-55 yaşda "Leyli və Məcnun" oynayasınız və illərlə seviləsiniz".

Telegramda izləyin