Beş ay müddətində qulağını ayağında daşıdı - FOTO

Çinin Şandonq əyalətində yaşayan bir qadın fabrikdə ağır iş qəzası keçirib. Qəza nəticəsində onun sol qulağı, baş dərisinin bir hissəsi və üz nahiyəsindəki dəri zədələnərək tamamilə qopub.

Sonxeber.az türk mediasına istinadən xəbər verir ki, həyati təhlükəsi olmasa da, zədələr çox ciddi olduğundan həkimlər qulağın bərpası üçün misilsiz bir tibbi üsula əl atıblar.

Həkimlər bildiriblər ki, zədələnmiş qan damarlarına görə qulaq dərhal öz yerinə tikilə bilməzdi. Qulağın yenidən sağlması üçün uyğun mühitə ehtiyac yaranmışdı. Bunun üçün ən ideal yer kimi ayağın üst hissəsi - dərinin nazik, damar quruluşunun isə qulağa oxşar olduğu nahiyə seçilib.

Mikro cərrahiyyə əməliyyatı son dərəcə çətin keçib. Cərrahlar diametri cəmi 0,2-0,3 millimetr olan damarları birləşdirmək üçün insan saçından daha incə alətlərdən istifadə ediblər. On saat davam edən əməliyyat nəticəsində qulaq ayağın üzərinə uğurla köçürülüb.

Əməliyyatdan sonra ilk günlər kritik olub. Qan dövranında yaranan problemlər səbəbilə həkimlər müdaxilə edərək qulağın yeni yerində sabitləşməsinə nail olublar. Qulağın tədricən çəhrayı rəng alması toxumanın dirildiyini göstərib.

Qadın beş ay boyunca qulağını ayağında daşımalı olub. Bu müddətdə yalnız geniş ayaqqabılar geyinib və toxumaya zərər verməmək üçün diqqətli addımlar ataraq gəzib. Paralel olaraq başındakı yaralar da sağalaraq ikinci əməliyyata şərait yaradıb.

Oktyabr ayında həkimlər ikinci əməliyyatı həyata keçirib. Qəza nəticəsində deformasiyaya uğramış baş dərisində uyğun damar və sinirləri tapmaq son dərəcə çətin olub. Cərrahlar mikroskop altında qat-qat işləyərək sağ qalan damar və sinir uclarını müəyyən edib və qulağı yenidən onlara bağlayıblar.

Beş aylıq səbr və çətinlikdən sonra qadının sol qulağı uğurla yenidən öz təbii yerinə qayıdıb. Bu qeyri-adi tibbi müdaxilə dünya tibb ictimaiyyətində böyük maraq doğurub.

Telegramda izləyin