Lövhəni endirdi, sərvəti götürdü: ağlasığmaz oğurluq - VİDEO

İstanbulun Bakırköy rayonunda baş verən inanılmaz oğurluq hadisəsi böyük səs-küyə səbəb olub. İkinci əl əşyaların satıldığı internet saytında dəyəri 40 min dollar (təxminən 2 milyon TL) olan qol saatını satışa çıxaran T.Y.D. (23) aldadıldığını bildirərək polisə müraciət edib.

Sonxeber.az türk mediasına istinadən xəbər verir ki, T.Y.D. polisə verdiyi ifadəsində özünü alıcı kimi təqdim edən bir şəxsin onu Bakırköydə yerləşən ofisinə dəvət etdiyini bildirib. Onun sözlərinə görə, ofisə gələn şəxs saatı diqqətlə yoxlayıb, çox bəyəndiyini və alacağını deyib. Daha sonra telefonla zəng edərək dostuna saatın dəyəri olan 40 min dolları gətirməsi üçün tapşırıq verib. Sonra saatı götürərək otaqda olan şkafın içinə yerləşdirib. Bir müddət gözlədikdən sonra tualetə gedəcəyini deyərək ofisdən çıxıb.

Şəxsin uzun müddət geri qayıtmamasından şübhələnən T.Y.D. şakfı açdıqda onun arxa hissəsində böyük bir dəlik olduğunu və saatın oğurlandığını anlayıb.

Hadisə ilə bağlı Dələduzluqla Mübarizə Bürosunun əməkdaşları tərəfindən aparılan araşdırma zamanı ofisin yerləşdiyi binadakı təhlükəsizlik kameralarının hadisə anını qeydə aldığı müəyyən edilib. Görüntülərdə şübhəlilərdən birinin şkafın arxa hissəsindəki dəliyi "Siqaret çəkmək qadağandır" yazılı xəbərdarlıq lövhəsi ilə gizlətdiyi və saatı həmin yerdən götürərək uzaqlaşdığı açıq şəkildə görünür.

Təhlükəsizlik kameralarının görüntüləri əsasında aparılan əməliyyatlar nəticəsində şübhəlilərdən Y.Ç. (54) saxlanılıb. Digər şübhəli C.E.-nin (50) Balıkesir şəhərinə qaçdığı müəyyən edilib və onun gizləndiyi ünvana keçirilən əməliyyat zamanı yaxalanıb. Evdə aparılan axtarış zamanı dəyəri təxminən 40 min dollar olan qol saatı da aşkar edilərək götürülüb.

Asayiş Şöbəsində dindirilən C.E.-nin daha əvvəl 11 cinayət hadisəsi üzrə qeydiyyatda olduğu məlum olub. Hər iki şübhəli məhkəməyə çıxarılaraq həbs edilib və cəzaçəkmə müəssisəsinə göndərilib. Tapılan bahalı saat isə sahibinə - T.Y.D.-yə təhvil verilib.

Telegramda izləyin