Taksi dayanacağında silahlı insident: Keçmiş əməkdaş özünü tapança və bıçaqla yaraladı

Türkiyənin Kocaeli vilayətinin İzmit rayonunda taksi dayanacağında silahlı insident baş verib. Məlumata görə, dayanacağın keçmiş əməkdaşı Erdem Mucır işçilərlə mübahisə etdikdən sonra özünü tapança və bıçaqla yaralayıb.

Sonxeber.az türk mediasına istinadən xəbər verir ki, hadisə saat 13:30 radələrində Cedit məhəlləsi, Turan Güneş prospektində, Kocaeli Dövlət Xəstəxanasının yaxınlığında yerləşən taksi dayanacağında qeydə alınıb. Daha əvvəl həmin dayanacaqda işləyən Erdem Mucır ora gələrək əməkdaşlarla mübahisə edib. Mübahisədən sonra üzərində olan tapançanı çıxaran Mucır havaya atəş açıb. Güllənin açılması nəticəsində o, çiynindən yaralanıb. Bu zaman dayanacaqda olan əməkdaşlar panika içində ərazini tərk ediblər.

Hadisə ilə bağlı əraziyə polis xüsusi təyinatlı qüvvələri və təcili tibbi yardım briqadaları cəlb olunub. Polis təhlükəsizlik tədbirləri görərək prospekti nəqliyyat vasitələrinin hərəkətinə bağlayıb, piyadaların keçidinə icazə verməyib. Əlində bıçaqla özünə xəsarət yetirməyə davam edən Mucır uzun sürən danışıqlara baxmayaraq təslim olmayıb.

Sonra qan itkisindən taqətdən düşən Erdem Mucır polis xüsusi təyinatlılarının keçirdiyi əməliyyat nəticəsində zərərsizləşdirilərək nəzarət altına alınıb. O, təcili tibbi yardım vasitəsilə Kocaeli Dövlət Xəstəxanasına çatdırılıb.

Faktla bağlı araşdırma aparılır.

Telegramda izləyin