Oğurladıqları telefonun siqnal vasitəsi ilə aşkar edilməməsi üçün görün nə etdilər

İstanbulun Beyoğlu rayonunda dörd oğrunun oğurladıqları mobil telefonun yerinin müəyyən edilməməsi üçün onu alüminium folqa ilə bükdüyü məlum olub.

Sonxeber.az türk mediasına istinadən xəbər verir ki, hadisə rayonun Kuloğlu məhəlləsində baş verib. Aprelin 6-da gecə saatlarında yolda hərəkət edən İrfan Y.-nin arxasınca dörd şübhəli yaxınlaşıb. Bir müddət sonra onlardan biri kişinin əlində olan mobil telefonu qəfil alaraq qaçıb. Hadisədən sonra qaçan şübhəlilər küçələrə dağılıb və izlərini itiriblər. Şübhəliləri təqib etsə də yaxalaya bilməyən İrfan Y. polisə müraciət edərək şikayətçi olub.

Şikayətdən sonra Beyoğlu Asayiş Bürosunun əməkdaşları hadisə ilə bağlı araşdırmaya başlayıb və ərazidəki təhlükəsizlik kameralarının görüntülərini incələyiblər. Aparılan araşdırma zamanı dörd şübhəlinin metroya minərək Gaziosmanpaşa və Tuzla istiqamətində getdiyi müəyyən edilib. Davam edən əməliyyat-axtarış tədbirləri nəticəsində şəxsiyyətləri müəyyən edilən şübhəlilər yaşadıqları ünvanlarda saxlanılıb və polis idarəsinə aparılıb.

Ünvanlarda aparılan axtarış zamanı polis əməkdaşları oğurlanan mobil telefonu alüminium folqaya bükülmüş vəziyyətdə aşkar ediblər. Şübhəlilərin ifadələrindən məlum olub ki, hadisədən sonra telefonun siqnalı vasitəsilə yerlərinin müəyyən edilməməsi üçün cihazı alüminium folqa ilə büküblər.

Polisdəki prosedurlar tamamlandıqdan sonra Muhammed Emir A. (18), A.T. (17), B.T. (17) və K.G. (17) məhkəməyə göndərilib. Məhkəmə qərarı ilə dörd şübhəli barəsində məhkəmə nəzarəti tədbiri seçilərək sərbəst buraxılıb. Polis tərəfindən tapılan mobil telefon isə sahibinə - İrfan Y.-yə təhvil verilib.

Telegramda izləyin