Qəzada ölən dostlarını avtomobildə qoyub qaçdılar

Ədirnədə baş verən yol-nəqliyyat hadisəsində 18 yaşlı gənc həyatını itirib. Hadisə Edirnə mərkəzinə bağlı Üyüklütatar kəndi ərazisində qeydə alınıb.

Sonxeber.az türk mediasına istinadən xəbər verir ki, məlumata görə, 18 yaşlı İsa Özerin idarə etdiyi 16 APR 045 dövlət nömrə nişanlı avtomobil güclü duman səbəbindən sürücünün sükan arxasında idarəetməni itirməsi nəticəsində suvarma kanalına aşıb. Avtomobildə olan gəncin dostları qəzanı gördükdən sonra hadisə yerini tərk ediblər.

Şahidlərin bildirdiyinə görə, başqa avtomobildə olan dostları kənd sakinlərinə qəza baş verdiyini deyərək ərazidən uzaqlaşıblar.

Hadisə barədə məlumat daxil olduqdan sonra əraziyə Fövqəladə Hallar Xidməti (AFAD) və xilasetmə briqadaları cəlb olunub. Xilasedicilər qayıq vasitəsilə suvarma kanalına daxil olaraq İsa Özerin avtomobildə sıxışıb qalmış cansız bədənini çıxarıblar.

Mərhumun cəsədi hadisə yerində aparılan ilkin baxışdan sonra ekspertiza üçün Trakya Universiteti Tibb Fakültəsi Xəstəxanasının morquna təhvil verilib.

Hadisə ilə bağlı jandarma tərəfindən araşdırma aparılır. Qəza zamanı hadisə yerini tərk edən şəxslərin müəyyən edilməsi və məsuliyyətə cəlb olunması istiqamətində əməliyyat-axtarış tədbirləri davam etdirilir.

Telegramda izləyin