Hindistanda fil sürüsü kənd sakinlərinə hücum etdi: 4 nəfər həlak oldu - VİDEO

Hindistanın Jharkhand ştatının Ramgarh bölgəsində 42 filin iştirak etdiyi sürü kəndlərə girərək sakinlərə hücum edib və bir neçə saat ərzində 4 nəfərin həyatına son qoyub.

Sonxeber.az xarici mediaya istinadən xəbər verir ki, Ramgarh bölgəsindəki kəndlərdə vəhşi fil sürüsünün ardıcıl hücumları panikaya səbəb olub.

İlk hücum dekabrın 16-da yerli vaxtla axşam saatlarında baş verib. Hadisə şahidlərinin sözlərinə görə, kənd sakinləri yol kənarında dincələn fil sürüsünə yaxınlaşıb onlarla foto çəkdirməyə çalışıblar. Bu zaman filin biri 33 yaşlı bir kişini tutub və əzərək öldürüb.

Gecə saatlarında sürü başqa bir kəndə daxil olub və filərin yüksək səslərindən qorxuya düşən sakinlər evlərindən qaçmağa başlayıblar. Çıxan xaos zamanı 40 və 45 yaşlı iki qadın fil tərəfindən əzilərək həyatını itirib. Daha sonra sürünün hücum etdiyi 35 yaşlı motosiklet sürücüsü də həlak olub.

Kəndlərdə bir sıra sakinlərin yaralandığı və evlərin zədələndiyi bildirilib. Bölgə hakimiyyətləri sürünün 42 fildən ibarət olduğunu və hələ də kənd ərazilərində aktiv olduğunu açıqlayıb. Hücumların qarşısını almaq üçün polis və digər təhlükəsizlik qüvvələri bölgəyə göndərilib.

Telegramda izləyin