3 futbolçu "Qarabağ"ı tərk edə bilər

Azərbaycanı UEFA Çempionlar Liqasında alqışalayiq şəkildə təmsil edən, turnirin Liqa mərhələsində 7 xal toplayaraq sona 2 tur qalmış pley-offa yüksəlmək şansını qoruyan "Qarabağ" gələn ay 3 futbolçusu ilə vidalaşa bilər.

Fanat.Az-ın məlumatına görə, bunlar Pedro Bikalyo, Marko Yankoviç və Fabiyan Buntiçdir.

Monteneqrolu yarımmüdafiəçi Yankoviçə 2 Yunanıstanın nəhəngi - "Olimpiakos"la "Panatinaykos" ciddi maraq göstərirsə, "8 nömrə"ni Zaqreb "Dinamo"su da sıralarına cəlb etmək niyyətindədir. "Maestro"nu istəyənlər arasında adlarını dəqiqləşdirə bilmədiklərimiz də var. Bu klublardan bəziləri yayda ağdamlılarla əlaqə saxlayıb, lakin tərəflər baş məşqçi Qurban Qurbanovun güvəndiyi adlardan olan Markonun keçidi ilə bağlı razılığa gəlməyiblər.

"Qarabağ"a mövsüm ərəfəsində qoşulan Pedro Bikalyo Braziliya təmsilçisi "Botafoqo"nun diqqət mərkəzindədir. Yerli mətbuatın da açıqladığı kimi, cənubi amerikalılar dayaq yarımmüdafiəçisi üçün 2 dəfə "köhlənlər"ə müraciət ünvanlayıblar. "Botafoqo" Bikalyonu sonradan transfer hüquqlarına yiyələnə bilmək şərti ilə icarəyə götürmək niyyətindədir. Hərçənd ikinci təklifədki məbləğ də Azərbaycan çempionunu tam qane etmir. Bu başqa məsələ ki, Bikalyo ölkəsinin ünlü komandasının formasını geyinməyin əleyhinə deyil.

Buntiçə gəlincə, Qurbanovun 3-cü qapıçı statusu ilə komandada saxladığı futbolçunun sərfəli təklif gələcəyi təqdirdə, yola salınacağı şübhə doğurmur. Amma Şahruddin Məhəmmədəliyevin zədələnərək əməliyyat olunması bu yöndə vəziyyəti dəyişə, yəni xorvat əsilli almaniyalının azı cari mövsümün sonuna qədər "Qarabağ"da qalmasını şərtləndirə bilər.

Telegramda izləyin