İranda etirazçılara pulemyotlardan atəş açıldı

İranda etirazçılara pulemyotlardan atəş açılıb.

Milli.Az xəbər verir ki, İranda milli valyutanın kəskin ucuzlaşması və inflyasiya fonunda başlayan kütləvi aksiyalar silahlı münaqişə həddinə çatıb. Təhlükəsizlik qüvvələrinin etirazçıları dağıtmaq üçün ağır silahlardan istifadə etdiyi bildirilir.

Ölkənin bir çox bölgəsində, xüsusilə Mərvdəşt şəhərində vəziyyət olduqca gərgindir. Şahidlərin verdiyi məlumata görə, bəzi dövlət binalarının, bankların və məktəblərin damlarında yerləşdirilən pulemyotlardan nümayişçilərə birbaşa atəş açılır. Sosial şəbəkələrdə yayılan görüntülərdə şəhər üzərində helikopterlərin uçduğu və fasiləsiz silah səslərinin eşidildiyi əks olunub.

Hadisələr artıq 18-dən çox vilayəti əhatə edib. Fars, Luristan, Çaharmahal və Bəxtiyari vilayətlərində real güllələrdən istifadə nəticəsində çox sayda insanın həlak olduğu və yaralandığı qeyd edilir. Azna şəhərində isə nümayişçilərin polis bölməsinə hücum etməsi nəticəsində baş verən atışmada 3 nəfər ölüb, 17 nəfər ağır yaralanıb. Ekspertlər bu aksiyaların 2022-ci ildə baş verən hadisələrdən sonra ən böyük xalq etirazı olduğunu vurğulayırlar. Hazırda bir çox bölgədə internetə çıxış məhdudlaşdırılıb və küçələrdə hərbi texnikanın hərəkəti müşahidə olunur.

Qeyd edək ki, İranda etiraz dalğası dekabrın 28-dən etibarən iqtisadi çətinliklər və sosial bərabərsizliyə etiraz olaraq başlayıb.

Telegramda izləyin