Bu ölkədə Yeni il fevralda olacaq - Niyə dəqiq tarixi yoxdur?

Çində Yeni il, Bahar bayramı kimi də tanınır. Şərq mədəniyyətində ən mühüm və ən hörmət edilən bayram hesab olunur. Bu bayramın qeyd edilməsi zamanı ölkə boyu rəngarəng küçə festivalları təşkil edilir, qohumlar və dostlar bir-birinə xoşbəxtlik və rifah rəmzi olan qırmızı rəngli hədiyyələr verirlər.

Lent.az xarici mediaya istinadla bildirir ki, qərb təqvimində sabit tarixə düşən Yeni ildən fərqli olaraq, Çin Yeni ili hər il müxtəlif günlərdə qeyd olunur. Bunun səbəbi Çin Yeni ilinin Ay-Günəş təqviminə əsaslanmasıdır.

Çin təqviminə görə 2026-cı il 17 fevral 2026-cı il tarixində başlayacaq.

Həmin gün Çin təqvimi ilə 4723-cü il başlayacaq. Ənənəyə əsasən, bayram iki həftə davam edir və 3 mart 2026-cı ildə başa çatacaq.

Çin Yeni ili (Çuntsze) gənc ay dövründə qeyd olunur. O, qış gündönümündən (21 dekabr 2025) sonra baş verən ikinci gənc ayın gününə təsadüf edir.

Bayramın tarixi ay-günəş təqviminə əsasən müəyyənləşdirildiyi üçün hər il dəyişir. Adətən Çin Yeni ili 21 yanvar-21 fevral tarixləri arasına düşür bu da Ayın və Günəşin dövrlərindən asılıdır.

Çin Yeni ilinin tarixi
Çin Yeni ilinin ilk dəfə nə vaxt qeyd edildiyi dəqiq məlum deyil. Lakin bəzi tədqiqatçılar onun yaranmasını e.ə. XIV əsrdə Şan sülaləsinin hakimiyyəti dövrü ilə əlaqələndirirlər. Bu gün Bahar bayramı kimi tanınan bu bayram çoxsaylı əfsanə və miflərlə zəngindir.

Qədim rəvayətlərdən birinə görə, hər yeni ilin əvvəlində Çin sakinləri Nyan adlı bir canavardan (adı "İl" mənasını verir) gizlənməyə məcbur olurdular. Nyan bayramın ilk günü peyda olur, yaşayış məntəqələrini dağıdırdı. Zamanla insanlar müşahidə etdilər ki, Nyan gur səslərdən, parlaq işıqlardan və qırmızı rəngdən qorxur. Buna görə də onu qorxutmaq üçün bu vasitələrdən istifadə etməyə başladılar. Məhz buradan qırmızı bəzəklər və fişəng atmaq ənənəsi yaranıb.

Çin mədəniyyətində əjdaha güc və uğurun rəmzidir, buna görə də bayramın ən parlaq elementlərindən biri əjdaha rəqsləridir. Bu mərasimlər zamanı küçələrdən uzun, rəngarəng əjdaha fiquru keçirilir və bu səhnə adətən bayramın kulminasiya nöqtəsi olur.

Telegramda izləyin