"Azərbaycan və ABŞ arasında keçirilən son görüş ikitərəfli münasibətlərin yeni mərhələyə qədəm qoyduğunu göstərir" - AÇIQLAMA

Azərbaycan və ABŞ arasında ikitərəfli əməkdaşlığın mövcud vəziyyəti müzakirə olunub.

Bu barədə Azərbaycan Xarici İşlər Nazirliyi məlumat yayıb.

Bildirilib ki, Azərbaycan xarici işlər nazirinin müavini Elnur Məmmədov ABŞ Ticarət və İnkişaf Agentliyinin (USTDA) Yaxın Şərq, Şimali Afrika, Avropa və Avrasiya regionları üzrə regional direktoru Karl Kressin rəhbərlik etdiyi nümayəndə heyətini qəbul edib.

Görüş zamanı iki ölkə arasında enerji, ticarət, TRIPP marşrutu da daxil olmaqla regional bağlantılar, iqtisadi sərmayə kimi sahələrdə ikitərəfli əməkdaşlığın mövcud vəziyyəti və ABŞ-nin özəl sektor nümayəndələrinin ölkədə müvafiq infrastruktur və logistika imkanları ilə tanış olması, əməkdaşlığın inkişaf perspektivləri müzakirə edilib.

"Azərbaycan və ABŞ arasında keçirilən son görüş ikitərəfli münasibətlərin yeni mərhələyə qədəm qoyduğunu göstərir", - bunu Sonxeber.az -a açıqlama verən politoloq Tural İsmayılov deyib:

"Xarici işlər nazirinin müavini Elnur Məmmədovun ABŞ Ticarət və İnkişaf Agentliyinin nümayəndə heyəti ilə müzakirələri bir daha sübut edir ki, tərəflər yalnız siyasi dialoqla kifayətlənmir, həm də konkret iqtisadi və strateji layihələr üzərində əməkdaşlığı dərinləşdirirlər. Enerji sahəsində əməkdaşlıq Azərbaycanın regionun enerji təhlükəsizliyində oynadığı mühüm rolu təsdiqləyir. ABŞ özəl sektorunun ölkədə infrastruktur və logistika imkanları ilə tanış olması isə gələcəkdə daha geniş sərmayə axınının başlanğıcı ola bilər.

TRIPP marşrutu və Orta Dəhliz kimi regional bağlantılar müzakirələrin əsas mövzuları sırasında yer alıb. Bu, Azərbaycanın geosiyasi mövqeyinin strateji əhəmiyyətini bir daha ortaya qoyur. Vaşinqton Sülh Sammitindən sonra Strateji Tərəfdaşlıq Xartiyasının hazırlanması istiqamətində aparılan təmasların yüksək qiymətləndirilməsi isə iki ölkə arasında uzunmüddətli əməkdaşlıq üçün siyasi iradənin mövcud olduğunu göstərir.

Bərpaolunan enerji resurslarının inkişafı, biznes və investisiya mühitinin əlverişliliyi, yeni əlaqələrin qurulması imkanları Azərbaycanın müasir iqtisadi modelinin əsas dayaqlarıdır. ABŞ ilə bu sahələrdə əməkdaşlıq həm ölkəmizin dayanıqlı inkişafına, həm də regionun sabitliyinə töhfə verəcək. Bu görüş bir daha sübut edir ki, Azərbaycan yalnız regional deyil, qlobal miqyasda da etibarlı tərəfdaşdır və ABŞ-la münasibətlər strateji xarakter daşıyır. İkitərəfli əməkdaşlığın mövcud vəziyyəti gələcəkdə daha da genişlənərək, hər iki tərəf üçün qarşılıqlı fayda gətirəcək".

Telegramda izləyin