Oğuz RİH başçısının hesabat yığıncağı keçirilib

13 yanvar 2026-cı il tarixdə, Oğuz rayon Mədəniyyət Mərkəzində 2025-ci ilin sosial-iqtisadi inkişafının yekunları və 2026-cı ildə qarşıda duran vəzifələrə dair Oğuz Rayon İcra Hakimiyyəti başçısının hesabat yığıncağı keçirilib.
Tədbirdə Oğuz Rayon İcra Hakimiyyətinin başçısı Cavid Əbdul-Qədirov, Azərbaycan Respublikası Prezidenti Administrasiyasının Ərazi-təşkilat məsələləri şöbəsinin 9-cu ərazi sektorunun müdiri İlqar Süleymanov, Milli Məclisin deputatı Eyvaz Qurbanov, Regional idarələrin rəhbərləri, Oğuz RİH başçısı yanında Şuranın üzvləri, rayonun hüquq-mühafizə orqanlarının rəhbərləri, idarə və müəssisə rəhbərləri, ictimaiyyət nümayəndələri, şəhid ailələri və rayon sakinləri iştirak ediblər.
Tədbir iştirakçıları əvvəlcə Ümummilli Lideri Heydər Əliyevin abidəsi önünə gül dəstələri düzərək xatirəsini ehtiramla yad ediblər.
Tədbir Dövlət Himninin səsləndirilməsi ilə başlayıb. Ulu Öndər Heydər Əliyevin, Azərbaycan Respublikasının dövlət müstəqilliyi və ərazi bütövlüyü uğrunda şəhid olmuş oğul və qızlarımızın əziz xatirəsi bir dəqiqəlik sükutla yad edilib.
Daha sonra Ümummilli Lideri Heydər Əliyevə həsr olunmuş videoçarx nümayiş edilmişdir.
Hesabat yığıncağında məruzə ilə çıxış edən Oğuz Rayon İcra Hakimiyyətinin başçısı Cavid Əbdul-Qədirov 2025-ci il ərzində rayonun sosial-iqtisadi inkişafı sahəsində görülmüş işlər, icra olunan layihələr, infrastrukturun yenilənməsi, əhalinin məşğulluğu, sosial rifahın yaxşılaşdırılması istiqamətində həyata keçirilən tədbirlər barədə ətraflı məlumat verib. O, həmçinin 2026-cı ildə qarşıda duran əsas vəzifələri diqqətə çatdırıb.
Xalqımızın mədəni irsinin qorunub saxlanmasına və təbliğ olunmasına xüsusi diqqət və qayğı ilə yanaşan Prezident İlham Əliyevə, Birinci vitse-prezident, Heydər Əliyev Fondunun prezidenti Mehriban xanım Əliyevaya bütün oğuzlular adından təşəkkür edib.
Hesabat yığıncağında çıxış edən Azərbaycan Respublikası Prezidenti Administrasiyasının Ərazi-təşkilat məsələləri şöbəsinin 9-cu ərazi sektorunun müdiri İlqar Süleymanov, Milli Məclisin deputatı Eyvaz Qurbanov, Şəki-Zaqatala Regional Məşğulluq filialının müdiri Abdulla Kərimov, şəhid Nail İbrahimlinin anası Aqibət İbrahimova rayonda aparılan quruculuq işlərini yüksək qiymətləndirərək, əldə olunan nailiyyətlərin Azərbaycan Respublikasının Prezidenti, Ali Baş Komandan İlham Əliyevin uğurlu siyasətinin nəticəsi olduğunu vurğulayıblar.
Tədbirdə hesabat yığıncağı adından Azərbaycan Respublikasının Prezidenti cənab İlham Əliyevə Oğuz Rayon İcra Hakimiyyəti başçısı yanında İctimai Şuranın sədri Günel Abdullayeva tərəfindən müraciət səsləndirilib, Sənəd dövriyyəsi, vətəndaş müraciətləri və inzibati işlər şöbəsinin müdiri Orxan Cabbarov tərəfindən yığıncağın yekun qərarı elan olunub.
Daha sonra xidməti sahələri üzrə uzun müddət səmərəli fəaliyyət göstərən və rayonun ictimai-siyasi həyatında fərqlənən 11 nəfər Oğuz Rayon İcra Hakimiyyətinin Təşəkkürnaməsi ilə təltif edilib.
Sonda bildirilib ki, Prezident İlham Əliyevin rəhbərliyi ilə Oğuz rayonu bundan sonra da davamlı inkişaf edəcək və qarşıya qoyulan vəzifələr uğurla icra olunacaq.

Telegramda izləyin