"Qanlı hadisələrdən sonra xalqın azadlıq arzusu daha da gücləndi" - AÇIQLAMA

"20 Yanvar - Ümumxalq Hüzn Günü Azərbaycan xalqının müasir tarixində həm faciə, həm də qəhrəmanlıq səhifəsidir. 1990-cı il yanvarın 19-dan 20-nə keçən gecə Sovet ordusunun Bakıya və digər şəhərlərə yeridilməsi nəticəsində yüzlərlə günahsız insan qətlə yetirildi, yüzlərlə yaralandı, bir çoxu itkin düşdü. Bu qanlı hadisə xalqın azadlıq hərəkatını boğmaq məqsədi daşısa da, əksinə, milli müstəqillik iradəsini daha da gücləndirdi. 20 Yanvar həm dərin kədər, həm də böyük qürur günü kimi yaddaşlarda yaşayır, çünki insanlar öz həyatlarını Azərbaycanın azadlığı, suverenliyi və ərazi bütövlüyü uğrunda qurban verdilər".

Bunu Sonxeber.az-a politoloq Tural İsmayılov danışıb.

O, açıqlamasında qeyd etdi bu gün hər il ölkədə geniş anım tədbirləri ilə qeyd olunur, şəhidlərin xatirəsi ehtiramla yad edilir:

"Onların mübarizəsi gənc nəsillərə milli qürur və azadlıq dərsi kimi təqdim olunur. Ulu Öndər Heydər Əliyevin Moskvada verdiyi bəyanat faciənin dünya ictimaiyyətinə çatdırılmasında mühüm rol oynadı və Azərbaycanın milli maraqlarını müdafiə etmək yolunda tarixi dönüş nöqtəsi oldu.

20 Yanvar faciəsi Azərbaycanın müstəqillik yolunda dönüş nöqtəsi hesab edilir. Qanlı hadisələrdən sonra xalqın azadlıq arzusu daha da gücləndi və 1991-ci ildə dövlət müstəqilliyinin bərpasına aparan proseslərin ideoloji dayağına çevrildi. Bu günün mahiyyəti yalnız hüzn deyil, həm də milli qürur və mübarizə iradəsidir.

Beləliklə, 20 Yanvar - Ümumxalq Hüzn Günü Azərbaycan xalqının azadlıq uğrunda göstərdiyi fədakarlığın, milli birliyin və müstəqillik əzminin simvoludur. Şəhidlərin xatirəsi hər zaman ehtiramla yad edilir, onların mübarizəsi isə müasir Azərbaycanın möhkəm ideoloji sütunlarından biri olaraq qalır".

Telegramda izləyin