"Tarif Şurası hər il bəhanə tapıb qiymət artımları həyata keçirir" - AÇIQLAMA

Son aylarda gündəlik xərclərin sürətlə artması və yanacaq, elektrik, qaz tariflərinin yüksəlməsi vətəndaşların narazılığını artırıb.

Bəs görəsən hal-hazırda ölkədə baş verən qiymət artımları daha çox qlobal təsirlərdən irəli gəlir, yoxsa daxili problemlər üstünlük təşkil edir?

İqtisadçı Xalid Kərimli bu barədə Sonxeber.az -a açıqlama verib:

"Hazırkı qiymət artımlarına həm ölkədaxili, həm də qlobal amillər təsir göstərir. İlin əvvəlindən dövlət dizel yanacağının qiymətini artırıb; il yarım əvvəl də qiymət yüksəlmişdi. Belə ki, dizelin qiyməti son il yarımda 80 qəpikdən 1 manat 10 qəpiyə qalxıb ki, bu təxminən 35 faiz artım deməkdir.

Eyni zamanda, işıq, su və qaz tarifləri də yüksəlir. Keçən il Tarif Şurası tərəfindən qiymətlər artırılmışdı, bu il isə əlavə sabit xərclər tətbiq olunaraq yenidən artırıldı. Tarif Şurası hər il bəhanə tapıb qiymət artımları həyata keçirir.

Qiymətlərin yüksəlməsinə təsir edən digər amillərdən biri idxal qiymətlərinin artmasıdır. Qlobal bazarlardakı dəyişikliklər ölkəyə idxal olunan məhsulların qiymətinə də təsir edir. Bundan əlavə, manatın dollar qarşısında dəyər itirməsi də inflyasiyanı artıran faktorlar arasındadır.

Daxili səbəblərə gəldikdə isə, bazarda rəqabətin zəif olması da qiymətlərin artmasına şərait yaradır. Beləliklə, hazırkı qiymət artımlarında iki daxili (Tarif Şurasının qərarları və bazardakı rəqabət çatışmazlığı) və iki xarici (idxal qiymətlərinin yüksəlməsi və manatın ucuzlaşması) amil mühüm rol oynayır."

Çiçək Sadatova

Telegramda izləyin