"Minimum əməkhaqqı ailələrin real ehtiyaclarını ödəməlidir" - AÇIQLAMA

Azərbaycanda minimum əməkhaqqının nominal artımı olsa da, ailələrin real ehtiyaclarını tam qarşılayıb-qarşılamadığı uzun müddətdir müzakirə mövzusudur. Ekspertlər bildirirlər ki, maaşın yalnız kağız üzərində artması ailələrin gündəlik ərzaq, dərman, geyim və kommunal xərclərini ödəməsi üçün kifayət etmir və real alıcılıq qabiliyyətini qorumaq üçün əlavə mexanizmlər tətbiq edilməlidir.

Sosioloq Elçin Bayramlı məsələ ilə bağlı Sonxeber.az -a danışıb:

"Dörd nəfərlik bir ailədə hər valideynin minimum əməkhaqqı 400 manat olsa, ümumi gəlir 800 manat edir. Halbuki yaşayış minimumuna əsaslanan hesablamalara görə həmin ailənin real ehtiyacı təxminən 1200 manatdır. Bu fərq ailələrin gündəlik həyatında ciddi çətinliklər yaradır: ərzaq, dərman, geyim və kommunal xərclər üzrə balansın qorunması çətinləşir, uşaq təhsili və əlavə sosial ehtiyaclar üçün büdcə məhdudlaşır.

Nominal maaş artımı bu boşluğu doldurmaq üçün kifayət etmir. Minimum əməkhaqqı ailələrin əsas ehtiyaclarını qarşılayacaq səviyyədə müəyyən edilməli və əmək bazarında ədalətli sistem qurulmalıdır. Yalnız bu zaman ailələr gündəlik həyatlarını stress və maliyyə gərginliyi olmadan qura bilərlər.

Əlavə olaraq, real alıcılıq qabiliyyətinin qorunması ailələr üçün uzunmüddətli planlaşdırmanı mümkün edir. Məsələn, gələcəkdə uşaq təhsili, tibbi xərclər və qəfil zəruri xərclər üçün ehtiyat yaratmaq imkanları genişlənir. Bu, yalnız fərdi rifah üçün deyil, sosial sabitliyin qorunması üçün də vacibdir. Nominal rəqəmlər deyil, pulun bazarda nə qədər həyat təmin edə bilməsi əsas meyardır".

Telegramda izləyin