Polisdən qaçdığı anları sosial mediada paylaşan sürücünün sonu görün necə bitdi - VİDEO

Düzcədə motosikletlə akrobatik hərəkətlər edərək yol hərəkəti təhlükəsizliyini ciddi şəkildə pozan və polis postundan qaçdığı anları sosial şəbəkədə paylaşan sürücü qısa müddətdə saxlanılıb.

Sonxeber.az türk mediasına istinadən xəbər verir ki, hadisə ilə bağlı yayılan görüntülərdən sonra Düzcə İl Jandarma Komandanlığının Yol Hərəkəti Şöbəsinin əməkdaşları araşdırmalara başlayıb. Sosial mediada paylaşılan video materiallar detallı şəkildə təhlil edilib və qaydaları kobud şəkildə pozan motosiklet sürücüsünün kimliyi müəyyənləşdirilib.

Aparılan araşdırmaların nəticəsinə əsasən, sürücüyə Türkiyənin 2918 saylı Avtomobil Yolları Hərəkəti Qanununun müvafiq maddələri üzrə inzibati cəza tədbirləri tətbiq olunub.

Düzcə İl Jandarma Komandanlığından verilən açıqlamada bildirilib ki, vətəndaşların can və əmlak təhlükəsizliyini təhdid edən bu cür davranışlara qətiyyən göz yumulmayacaq. Açıqlamada vurğulanıb ki, şəhərdə ictimai təhlükəsizliyin qorunması istiqamətində tədbirlər bundan sonra da vətəndaşların dəstəyi ilə qətiyyətlə davam etdiriləcək.

Səlahiyyətli qurumlar xüsusilə sosial şəbəkələrdə yayılan və yol hərəkəti təhlükəsizliyini risk altına alan görüntülərin daim nəzarətdə saxlanıldığını qeyd edərək, sürücüləri qaydalara əməl etməyə bir daha çağırıblar. Bildirilib ki, ictimai qaydanın və təhlükəsizliyin təmin olunması məqsədilə nəzarət tədbirləri fasiləsiz davam etdiriləcək.

Telegramda izləyin