Əhalinin borclanma səviyyəsi ilə bağlı real risk varmı? - AÇIQLAMA

Son dövrlərdə kreditlərin və istehlak borclarının artması əhalinin maliyyə vəziyyətinə dair sualları gündəmə gətirib.

Xüsusilə maaş kartları, kredit kartları və istehlak kreditləri vasitəsilə borclanma genişlənərkən, vətəndaşlar arasında "borc yükü hansı həddə çatanda risk yaradır?" sualı ön plana çıxır.

Bəs görəsən əhalinin borclanma səviyyəsi ilə bağlı real risk varmı?

İqtisadçı Xalid Kərimli məsələ ilə bağlı Sonxeber.az -a açıqlama verib:

"Əhalinin borclanma səviyyəsi ilə bağlı ciddi risklər müşahidə olunmur və proses Mərkəzi Bankın nəzarəti altındadır. Kreditlər rəsmi və şəffaf gəlirlər əsasında verilir, vətəndaşların qeyri-rəsmi qazancı nəzərə alınmır ki, bu da bank sektorunda risklərin idarə olunmasına kömək edir.

Bundan əlavə, kredit ayrılarkən vətəndaşın aylıq gəliri əsas götürülür və ödəniş qrafiki gəlirin 45 faizindən artıq ola bilməz. Bu tələb banklar tərəfindən ciddi şəkildə tətbiq olunur. Kredit kartları üzrə də məhdudiyyətlər mövcuddur - vətəndaşa maaşının 5 mislindən artıq limit ayrılmasına icazə verilmir.

Həm tənzimləyici çərçivə, həm də tətbiq olunan nəzarət mexanizmləri əhalinin həddindən artıq borclanmasının qarşısını almağa xidmət edir. Mövcud statistik göstəricilər də təsdiqləyir ki, ev təsərrüfatlarının borc yükü ümumi iqtisadiyyatın həcmi ilə müqayisədə aşağı səviyyədə qalır. Bu isə maliyyə sabitliyi baxımından müsbət amil hesab olunur".

Çiçək Sadatova

Telegramda izləyin