"Azərbaycançılıq ideologiyasının təbliği hər zaman geniş şəkildə davam etdirilməlidir" - DEPUTAT

"Azərbaycançılıq ideologiyasının əsasında xalq arasında milli birlik və həmrəyliyin möhkəmləndirilməsi dayanır. Bu ideologiyanın müəllifi Ulu Öndər Heydər Əliyevdir. Amma Azərbaycan yenidən müstəqilliyinə qovuşduğu ilk illərdə xalqı birləşdirən bir ideologiya olmadığından ölkədə parçalanma baş vermiş və vəziyyət vətəndaş müharibəsi səviyyəsinə gəlmişdi. Ümummilli Lider Heydər Əliyevin yenidən hakimiyyətə qayıdışı dövlət müstəqilliyimizi bütün təhlükələrdən qurtardı və Azərbaycanla bağlı hər bir şəxsi bir ideologiya ətrafında birləşdirərək "Dəmir yumruq"a çevirdi".

Bu sözləri Sonxeber.az-a Milli Məclisin deputatı Azər Badamov danışıb.

O, açıqlamasında qeyd edib ki, azərbaycançılıq ideologiyasının təbliği hər zaman geniş şəkildə davam etdirilməlidir:

"Bununla bağlı dövlət qurumlarının, təhsilin və medianın üzərinə xüsusi vəzifələr düşür.

Dövlət qurumları ilk növbədə ölkədə yaşayan bütün insanları vahid dövlət dili ətrafında birləşdirməklə azərbaycançılıq məktəbləri, yay düşərgələri və könüllülük proqramları təşkil etməlidir. Keçirilən bu tədbirlər regionları əhatə edən gənclərin qarşılıqlı səfərləri vasitəsilə bir-birini daha yaxından tanımasına imkan yaratmalıdır. Təbii ki, hər bir tədbir çərçivəsində dövlət ideologiyası aşılanmalı və ölkədə yaşayan və ya ölkə ilə bağlı olan hər kəsi birləşdirmək istiqamətində iş aparılmalıdır.

Diasporla İş üzrə Dövlət Komitəsi xaricdə yaşayan azərbaycanlılarla (etnik və dini mənsubiyyətindən asılı olmayaraq) təşkilatlanmış şəkildə iş aparmalı və onlar koordinasiya edilməlidir. Əlbəttə ki, azərbaycançılıq ideologiyası ətrafında daha dərindən birləşmə üçün hər bir şəxsin hüquq və azadlıqları qanunlarla qorunmalıdır. Bu baxımdan Azərbaycan Respublikasının Konstitusiyası bütün vətəndaşların hüquq və azadlıqlarına təminat verən əsas ana qanun olaraq azərbaycançılıq ideologiyası ətrafında hər kəsin birləşməsinə yol açır. Vətəndaş dövlətə güvəndikcə ideologiya təbii şəkildə qəbul olunur.

Azərbaycançılıq ideologiyasının daha da inkişaf etdirilməsində medianın rolu xüsusilə qeyd olunmalıdır. Belə ki, göstərilən filmlər, işıqlandırılan xəbərlər xalqların birliyinə və vahid vətən olan Azərbaycana sevgiyə sövq etməlidir. Azərbaycançılığı fərqli etnosların, dinlərin və regionların ortaq hekayəsi kimi təqdim edən kontentlər işıqlandırılmalıdır. Mediamız müasir media mənbələri olan sosial şəbəkələrdə azərbaycançılıq ideologiyası ilə bağlı qısa videoçarxlar və materialları mütəmadi olaraq işıqlandırmalıdır".

Deputat onu da vurğuladı ki, Azərbaycançılıq ideologiyasının daha dərindən açıqlanmasında təhsilin rolu əvəzolunmazdır:

"Belə ki, məktəblərdə və universitetlərdə eyni auditoriyalarda fərqli din və dillərin nümayəndələri bir yerdə təhsil alır. Bu baxımdan azərbaycançılıq ideologiyasının ortaq dəyər olduğunu təbliğ etmək üçün gənc nəslin tərbiyə olunmasında xüsusi proqramlar icra edilməlidir.

Beləliklə, azərbaycançılıq ideologiyasının aşılanması müəyyən dövr üçün nəzərdə tutulmuş kampaniya yox, dünən, bu gün və gələcəkdə gündəlik həyat tərzimiz olmalıdır".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Azərbaycançılıq ideyasının təbliği" mövzusuna uyğun olaraq dərc edilir.

Telegramda izləyin