Sevgililər Günündə restoran qiymətlərinin kəskin şəkildə artmasının səbəbi nədir? - AÇIQLAMA

Hər il fevralın 14-ü yaxınlaşdıqca şəhərdə təkcə romantika yox, qiymət artımı da hiss olunmağa başlayır. Xüsusilə restoran sektorunda Sevgililər Günü "pik mövsüm" hesab olunur və bu da menyulardan tutmuş rezervasiyalara qədər hər şeyin bahalaşması ilə nəticələnir.

Bir çox cütlük üçün bu gün xüsusi xatirə yaratmaq fürsəti olsa da, eyni tarixə yönələn kütləvi maraq qiymətlərin kəskin şəkildə yüksəlməsinə səbəb olur.

Bəs bu bahalaşma nə dərəcədə əsaslıdır və arxasında hansı amillər dayanır?

İqtisadçı Xalid Kərimli məsələ ilə bağlı Sonxeber.az -a açıqlama verib:

"Sevgililər Günündə restoran qiymətlərinin artmasının əsas səbəbi insanların eyni gündə çölə çıxmağa üstünlük verməsidir. Tələbat kəskin şəkildə yüksəldiyi üçün bu, avtomatik olaraq qiymətlərə də təsir edir. Bu, emosional deyil, tamamilə normal bazar qanunudur: tələbat artdıqca qiymət də artır.

Bundan əlavə, bir çox restoran həmin gün üçün xüsusi proqramlar hazırlayır. Canlı musiqi, şou proqramlar, xüsusi bəzədilmiş interyer, fərqli menyular - bütün bunlar əlavə xərc deməkdir. Dəvət olunan müğənnilər və musiqi qrupları da məhz bu tarixdə daha yüksək qonorar tələb edirlər, çünki onlar üçün də ən "qızğın" iş günü məhz 14 fevraldır. Beləliklə, xərclər zəncirvari şəkildə artır və bu da son qiymətə əks olunur.

Amma vacib bir məqam var: sevgini qeyd etmək üçün təqvimdə yalnız bir gün yoxdur. Cütlüklər mütləq şəkildə məhz 14 fevral axşamı restoranda olmağa məcbur deyillər. Bir gün əvvəl və ya bir gün sonra eyni atmosferi daha sakit, daha rahat və çox vaxt daha münasib qiymətlərlə yaşamaq mümkündür. Hətta bəzən bu, daha səmimi və stresssiz olur".

Telegramda izləyin