"Xocalı soyqırımı xalqımızın yaddaşından heç vaxt silinməyəcək dəhşətli hadisədir" - DEPUTAT

"Xocalı soyqırımı xalqımızın yaddaşından heç vaxt silinməyəcək dəhşətli hadisədir. 1992-ci il fevralın 26-da Ermənistanın təcavüzkar qüvvələri Azərbaycanın Xocalı şəhərində bəşəriyyət tarixinin ən qanlı faciələrindən biri olan soyqırımını törətdilər. Xocalı soyqırımı ilə ermənilər Xocalının yer üzündən silinməsini və məhv edilməsini reallaşdırdıqlarını düşünürdülər. Xocalı faciəsi Azərbaycan xalqının yaddaşında sağalmaz bir yara olsa da, bu torpaqların azad edilməsi və bərpası xalqımızın qürur və qətiyyət simvoludur. Müzəffər Azərbaycan Ordusu Xocalı şəhidlərinin qisasını aldı, onların qanı yerdə qalmadı. Bu gün Xocalı artıq qara xatirələr şəhəri deyil, Azərbaycanın əzəmətinin və yenilməzliyinin rəmzi kimi yenidən qurulur".

Bu sözləri Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, Xocalı soyqırımının iştirakçıları olan Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərləri barəsində açıq məhkəmə iclaslarında baxılan cinayət işləri üzrə yekun qərar qəbul edilmiş və həmin şəxslər törətdikləri əməllərə görə müvafiq qaydada cəzalandırılmışlar:

"Azərbaycan dövlətinin məqsədyönlü siyasəti və beynəlxalq miqyasda həyata keçirilən tədbirlər nəticəsində Xocalı soyqırımı haqqında həqiqətlər dünya ictimaiyyətinə təqdim olunur. Artıq bir sıra ölkələr tərəfindən bu faciə Ermənistanın törətdiyi soyqırımı kimi qəbul olunub.

Prezident İlham Əliyevin Xocalıya mütəmadi səfərləri regionda aparılan bərpa-quruculuq işlərinə birbaşa nəzarətin həyata keçirildiyini, dövlət suverenliyinin möhkəmləndirilməsini və sosial-iqtisadi inkişafın sürətləndirilməsini əks etdirir. Bu səfərlər çərçivəsində infrastruktur layihələrinin icrası, iqtisadi fəaliyyətin genişləndirilməsi, əhalinin məskunlaşdırılması və tarixi-mədəni irsin qorunması istiqamətində görülən tədbirlər dövlət siyasətinin prioritetlərini nümayiş etdirir. Eyni zamanda, bu fəaliyyətlər Xocalının yenidən dirçəldilməsi və regionun uzunmüddətli inkişaf strategiyasının həyata keçirilməsi baxımından mühüm siyasi və praktiki əhəmiyyət kəsb edir. Xocalı şəhərinə və rayonun kəndlərinə əhalinin mərhələli şəkildə köçürülməsi işğaldan azad edilmiş ərazilərdə həyatın bərpası, sosial-iqtisadi inkişafın təmin olunması və regionda dayanıqlı məskunlaşmanın formalaşdırılması siyasətinin tərkib hissəsidir. Bu proses dövlətin postmünaqişə dövründə ərazilərin yenidən qurulması, infrastrukturun bərpası və əhalinin doğma torpaqlarına qayıdışının təmin edilməsi istiqamətində həyata keçirdiyi strateji tədbirlərin davamlı xarakter daşıdığını göstərir.

Eyni zamanda, görülən uğurlu işlərin nəticəsidir ki, milli faciəmiz xalqımızın yaddaşında yaşadılır, böyüməkdə olan nəslə aşılanır. Bu həm də ona görə vacibdir ki, gələcəyimiz olan yeni nəsil tarixi həqiqətləri daha yaxşı qavramaqla ümumxalq işinə öz töhfəsini versin, düşmənini dostundan seçə bilsin. Əlbəttə, milli faciələrimiz haqqında həqiqətlərin təbliğ olunması və yaddaşlarda yaşadılması üçün dövlətin gördüyü tədbirlərlə yanaşı, hər bir fərdin də üzərinə böyük məsuliyyət düşür. Hər birimiz öz ailəmizdə övladlarımızı düzgün tərbiyə etməli, tariximizi onlara düzgün şəkildə çatdırmalıyıq".

Vüsalə İbrahimli

Telegramda izləyin