Mağaza açılışı zamanı yaranan izdihamda insanlar bir-birini əzdilər

Türkiyənin Sivas şəhərində endirimli satış edən geyim mağazasının açılışı zamanı izdiham yaşanıb.

Sonxeber.az türk mediasına istinadən xəbər verir ki, ucuz məhsul almaq istəyən vətəndaşlar səhər saatlarından etibarən mağaza qarşısında uzun növbələr yaradıb. Bazar qiymətlərindən aşağı qiymətlərlə satış həyata keçirən mağazanın qapıları açılan kimi içəri daxil olmaq istəyən izdiham bir-birini itələyərək mağazaya girməyə çalışıb. Qısa müddət ərzində yaranan sıxlıq bəzi vətəndaşların əzilmə təhlükəsi ilə üzləşməsinə səbəb olub.

İzdiham zamanı bəzi şəxslər ayaqqabılarını itirib. Mağaza qarşısında alış-veriş etmək üçün insanların bir-biri ilə mübarizə apardığı anlar isə mobil telefon kameralarına düşüb və sosial şəbəkələrdə yayılıb.

Mağaza nümayəndəsi Turan Karacagil bildirib ki, açılış zamanı gözlənilmədiyi qədər böyük izdiham yaşanıb. Onun sözlərinə görə, açılışa təxminən minə yaxın müştəri gəlib və qapılar açılan kimi sıxlıq yaranıb. Nəticədə bəzi müştərilər əzilmə təhlükəsi ilə üzləşib, hətta ayaqqabısını itirənlər də olub. Bəzi şəxslər isə itirdikləri ayaqqabını təxminən bir saat sonra tapa biliblər.

Telegramda izləyin