İnsan niyə bəzən heç bir səbəb olmadan narahatlıq və gərginlik hiss edir? - AÇIQLAMA

Gündəlik həyatda bir çox insan bəzən heç bir aydın səbəb olmadan narahatlıq və gərginlik hiss etdiyini deyir.

Xarici tərəfdən hər şey normal görünsə də, daxildə izahı çətin olan bir sıxıntı və ya narahatlıq yaranır.

Bəs görəsən bunun səbəbi nədir: İnsan niyə bəzən heç bir səbəb olmadan narahatlıq və gərginlik hiss edir?

Psixoloq G.Qədirli bu barədə Sonxeber.az -a açıqlama verib:

"Insanın səbəbsiz kimi görünən narahatlıq hiss etməsi əslində beynin təhlükəni qabaqcadan hiss etmə mexanizmi ilə əlaqəlidir. Bəzən insan şüurlu şəkildə bunun fərqində olmasa da, beyin gündəlik stress, yorğunluq, emosional yüklənmə və ya həll olunmamış problemləri "təhlükə siqnalı" kimi qəbul edir. Nəticədə bədəndə gərginlik, narahatlıq, səbəbsiz həyəcan və ya sıxıntı hissi yarana bilər.

Bu vəziyyət çox vaxt uzunmüddətli stress, yuxu çatışmazlığı, iş və şəxsi həyatda yaşanan təzyiq, həmçinin həddindən artıq informasiya yükü ilə də bağlı olur. İnsan gün ərzində çoxlu məlumat və emosional stimul qəbul etdikdə, beyin bu yüklənməni emal etməkdə çətinlik çəkir və nəticədə narahatlıq hissi meydana çıxır.

Digər tərəfdən, bəzən insanın keçmişdə yaşadığı emosional təcrübələr də belə hisslərin yaranmasına səbəb ola bilər. Həll olunmamış qorxular, daxili gərginlik və ya uzun müddət basdırılmış emosiyalar müəyyən vaxtlarda səbəbsiz kimi görünən narahatlıq şəklində üzə çıxa bilər.

Belə halların tez-tez təkrarlanması insanın psixoloji vəziyyətinə diqqət yetirməsi üçün siqnal ola bilər. Stressin azaldılması, kifayət qədər istirahət, fiziki aktivlik və emosiyaların açıq şəkildə ifadə edilməsinin bu kimi narahatlıqları azaltmağa kömək edə bilər, lakin narahatlıq hissi uzun müddət davam edərsə və gündəlik həyata təsir etməyə başlayarsa, psixoloqa müraciət etməyi tövsiyə edirəm".

Telegramda izləyin