"XIII Qlobal Bakı Forumu qlobal çağırışların müzakirə olunduğu mühüm beynəlxalq platformalardan biridir" - DEPUTAT

"Dünya siyasətində transformasiya proseslərinin sürətləndiyi bir dövrdə keçirilən XIII Qlobal Bakı Forumu qlobal çağırışların müzakirə olunduğu mühüm beynəlxalq platformalardan biridir"- bunu Sonxeber.az -a açıqlama verən deputat Şahin Seyidzadə deyib:

"Forum çərçivəsində dünyanın müxtəlif ölkələrindən olan siyasətçilər, dövlət və hökumət başçıları, beynəlxalq təşkilatların nümayəndələri, nüfuzlu ekspertlər və analitiklər bir araya gələrək beynəlxalq münasibətlər sistemində baş verən dəyişiklikləri və onların gələcək təsirlərini müzakirə edirlər. Forumda çıxış edən Azərbaycan Respublikasının Prezidenti İlham Əliyev müasir dünyada təhlükəsizlik, sülh, sabitlik və iqtisadi əməkdaşlıq məsələlərinin getdikcə daha böyük əhəmiyyət kəsb etdiyini xüsusi vurğuladı. Dövlət başçısı qeyd etdi ki, hazırda beynəlxalq sistemdə baş verən proseslər dövlətlərin qarşısında yeni çağırışlar qoyur və bu çağırışlara cavab vermək üçün ölkələr arasında daha sıx əməkdaşlıq, qarşılıqlı etimad və siyasi iradə tələb olunur. Prezident İlham Əliyevin forumda səsləndirdiyi fikirlər Azərbaycanın beynəlxalq münasibətlər sistemində oynadığı rolun və ölkənin strateji baxışının aydın ifadəsi kimi diqqəti cəlb edir. Dövlət başçısının çıxışı həm regional təhlükəsizlik məsələlərinə, həm də qlobal səviyyədə baş verən geosiyasi proseslərə dair mühüm mesajlar ehtiva edirdi. Prezident İlham Əliyevin sözlərinə görə, hazırda dünya yeni geosiyasi və iqtisadi reallıqların formalaşdığı keçid dövrünü yaşayır. Son illərdə beynəlxalq münasibətlər sistemində müşahidə olunan dəyişikliklər, regional münaqişələrin artması, yeni təhlükəsizlik risklərinin meydana çıxması və iqtisadi qeyri-sabitlik qlobal siyasi mühitin daha mürəkkəb xarakter almasına səbəb olmuşdur. Prezident İlham Əliyev vurğuladı ki, belə bir şəraitdə dövlətlərin əsas prioritetlərindən biri təhlükəsizliyin təmin olunmasıdır. Çünki təhlükəsizlik olmadan iqtisadi inkişaf, sosial rifah və digər sahələrdə əldə olunan nailiyyətlərin davamlılığı təmin edilə bilməz. Dövlət başçısı qeyd etdi ki, son illərdə dünyada baş verən hadisələr bir daha göstərir ki, təhlükəsizlik, sabitlik və müdafiə məsələləri hər bir ölkənin gündəliyində bir nömrəli prioritet olmalıdır. Bu baxımdan beynəlxalq ictimaiyyət qlobal təhlükəsizlik problemlərinin həlli üçün daha koordinasiyalı fəaliyyət göstərməlidir. Bu prosesdə beynəlxalq dialoq platformalarının xüsusi rolu var. XIII Qlobal Bakı Forumu kimi beynəlxalq tədbirlər müxtəlif ölkələrin nümayəndələrinin bir araya gələrək qlobal problemlər ətrafında fikir mübadiləsi aparmasına və ortaq həll yollarının axtarılmasına imkan yaradır. Prezident İlham Əliyevin çıxışında xüsusi yer tutan məsələlərdən biri Azərbaycanın münaqişədən sülhə keçid təcrübəsi oldu. Azərbaycan uzun illər regionda davam edən münaqişənin təsiri altında yaşamış ölkələrdən biridir. Təxminən 30 il ərzində Azərbaycanın ərazilərinin bir hissəsi işğal altında olmuş və bu müddət ərzində yüz minlərlə azərbaycanlı doğma torpaqlarından didərgin düşmüşdür. Bu dövrdə beynəlxalq təşkilatlar tərəfindən qəbul edilmiş qərarlar, o cümlədən BMT Təhlükəsizlik Şurası tərəfindən qəbul edilən qətnamələr işğalçı qüvvələrin Azərbaycan ərazilərindən çıxarılmasını tələb etsə də, bu sənədlər uzun illər ərzində icra edilməmişdir. Bu isə beynəlxalq hüququn tətbiqində mövcud olan problemləri bir daha göstərirdi. Prezident İlham Əliyevin qeyd etdiyi kimi, Azərbaycan öz suverenliyini və ərazi bütövlüyünü bərpa etmək üçün beynəlxalq hüququn prinsiplərinə əsaslanaraq qətiyyətli addımlar atdı. 2020-ci ildə baş verən İkinci Qarabağ Müharibəsi nəticəsində Azərbaycan işğal altında olan ərazilərini azad etdi və regionda yeni geosiyasi reallıq formalaşdı. Dövlət başçısı vurğuladı ki, Azərbaycan əvvəlcə güc tətbiq etməklə işğala son qoydu, daha sonra isə sülh gündəliyi ilə çıxış etdi. Bu yanaşma müasir beynəlxalq münasibətlər tarixində nadir nümunələrdən biri hesab olunur. Çünki çox vaxt müharibələr uzunmüddətli düşmənçilik və qarşıdurma ilə nəticələnir. Azərbaycan isə əksinə, münaqişədən sonra sülh və əməkdaşlıq təşəbbüsləri irəli sürdü. Prezident İlham Əliyev çıxışında qeyd etdi ki, Azərbaycan və Ermənistan artıq müəyyən müddətdir sülh şəraitində yaşayırlar. Sərhəddə sabitlik təmin olunmuş, atəşkəs pozuntuları dayandırılmış və regionda yeni əməkdaşlıq imkanları yaranmışdır.
Azərbaycanın sülh təşəbbüsləri regionda iqtisadi əməkdaşlıq üçün də yeni perspektivlər açır. Dövlət başçısı vurğuladı ki, sülh yalnız imzalanmış sənədlərlə deyil, həm də real addımlarla möhkəmləndirilməlidir. Bu baxımdan Azərbaycanın atdığı addımlar - ticarət əlaqələrinin qurulması, nəqliyyat və tranzit imkanlarının açılması sülhün praktiki nəticələrinin əldə olunmasına xidmət edir. Prezident İlham Əliyev dəfələrlə vurğulayıb ki, sülhdən daha yaxşı alternativ yoxdur. Müharibə yalnız dağıntı və itkilər gətirir, sülh isə inkişaf və tərəqqi üçün yeni imkanlar yaradır. Bu baxımdan Azərbaycanın regionda sülh və sabitlik naminə atdığı addımlar beynəlxalq ictimaiyyət tərəfindən də yüksək qiymətləndirilir. Prezident İlham Əliyevin çıxışında xüsusi diqqət yetirilən mövzulardan biri enerji təhlükəsizliyi idi. Dövlət başçısı qeyd etdi ki, müasir dünyada enerji təhlükəsizliyi ölkələrin milli təhlükəsizliyinin ayrılmaz hissəsinə çevrilmişdir. Azərbaycan zəngin enerji resurslarına malik ölkə kimi qlobal enerji bazarında mühüm rol oynayır. Ölkə neft və qaz ehtiyatlarının səmərəli şəkildə istifadəsi və onların beynəlxalq bazarlara çatdırılması istiqamətində uğurlu siyasət həyata keçirir. Azərbaycanın enerji siyasəti yalnız resursların ixracına deyil, həm də enerji bazarında sabitliyin təmin olunmasına yönəlib. Bu baxımdan Azərbaycan OPEC+ formatında məsuliyyətli tərəfdaş kimi çıxış edir və neft bazarında tarazlığın qorunmasına töhfə verir. Prezident İlham Əliyev qeyd etdi ki, enerji qiymətlərində kəskin dalğalanmalar həm istehlakçılar, həm də istehsalçılar üçün problemlər yarada bilər. Bu səbəbdən enerji bazarında balansın qorunması və proqnozlaşdırıla bilən qiymət siyasətinin həyata keçirilməsi xüsusi əhəmiyyət kəsb edir. Azərbaycanın həyata keçirdiyi nəqliyyat və logistika layihələri Avrasiya məkanında iqtisadi inteqrasiyanın genişlənməsinə mühüm töhfə verir. Son illər ərzində ölkədə nəqliyyat infrastrukturunun modernləşdirilməsi istiqamətində genişmiqyaslı layihələr həyata keçirilmişdir. Bu gün Azərbaycan Şərq-Qərb nəqliyyat dəhlizi və Şimal-Cənub nəqliyyat dəhlizi kimi beynəlxalq layihələrdə mühüm rol oynayır. Bu dəhlizlər Avropa ilə Asiya arasında ticarət əlaqələrinin genişlənməsinə və yükdaşımaların sürətləndirilməsinə xidmət edir. Azərbaycan həmçinin Orta Dəhliz layihəsinin inkişafında fəal iştirak edir. Bu marşrut Asiya ilə Avropa arasında ən qısa və səmərəli nəqliyyat yollarından biri hesab olunur. Prezident İlham Əliyevin qeyd etdiyi kimi, Azərbaycanın bu layihələrdə fəal iştirakı ölkənin tranzit və logistika mərkəzinə çevrilməsinə imkan yaratmışdır. Bu isə yalnız Azərbaycan üçün deyil, regionun bütün ölkələri üçün iqtisadi faydalar yaradır. Prezident İlham Əliyevin XIII Qlobal Bakı Forumunda səsləndirdiyi fikirlər göstərir ki, Azərbaycan beynəlxalq siyasətdə balanslı və praqmatik strategiya həyata keçirir. Bu strategiyanın əsas məqsədi regional sabitliyin möhkəmləndirilməsi, iqtisadi əməkdaşlığın genişləndirilməsi və qlobal təhlükəsizlik sisteminin gücləndirilməsinə töhfə verməkdir. Azərbaycanın həyata keçirdiyi siyasət ölkənin beynəlxalq nüfuzunun artmasına səbəb olmuşdur. Bu gün Azərbaycan həm regionda, həm də qlobal səviyyədə etibarlı tərəfdaş kimi tanınır. XIII Qlobal Bakı Forumu isə bir daha göstərdi ki, Azərbaycan beynəlxalq dialoq və əməkdaşlıq üçün mühüm platformaya çevrilmişdir. Prezident İlham Əliyevin forumda səsləndirdiyi fikirlər qlobal çağırışlar qarşısında Azərbaycanın strateji baxışını və gələcək inkişaf istiqamətlərini aydın şəkildə ortaya qoyur. Beləliklə, yeni dünya düzəninin formalaşdığı bir dövrdə Azərbaycan öz müstəqil siyasəti, strateji baxışı və sülh təşəbbüsləri ilə beynəlxalq münasibətlər sistemində mühüm rol oynamağa davam edir. Bu siyasət regional sabitliyin möhkəmlənməsinə və qlobal əməkdaşlığın inkişafına mühüm töhfə verir".

Telegramda izləyin