"Tez uğur qazanmaq" istəyi gənclərin psixologiyasına necə təsir edir? - AÇIQLAMA

Müasir dövrdə xüsusilə gənclər arasında "tez uğur qazanmaq" istəyi getdikcə daha çox yayılır.

Sosial şəbəkələrdə qısa müddətdə böyük nailiyyətlər əldə edən insanların ön plana çıxarılması, "bir gecədə məşhur olmaq" hekayələri bu istəyi daha da gücləndirir.

Bəs "tez uğur qazanmaq" istəyi gənclərin psixologiyasına necə təsir edir?

Psixoloq Gülsər Qədirli bu barədə Sonxeber.az -a açıqlama verib :

"Tez uğur qazanmaq" istəyi insanın motivasiyasını artıran faktor kimi görünsə də, bu düşüncə uzunmüddətli perspektivdə bir sıra psixoloji problemlərə yol aça bilər. Ən əsas təsirlərdən biri səbir səviyyəsinin aşağı düşməsidir. İnsan nəticəni tez əldə etməyə alışdıqda, prosesə dözmək, addım-addım irəliləmək onun üçün çətinləşir.

Bu istək həm də daimi narazılıq hissi yaradır. Çünki real həyatda uğur çox vaxt zaman, zəhmət və təkrar cəhdlər tələb edir. Gözləntilər yüksək, nəticələr isə gec olduqda insan özünü uğursuz hesab etməyə başlayır. Bu da özünə inamın azalmasına və hətta depressiv əhvalın formalaşmasına səbəb ola bilər.

Digər tərəfdən, "tez uğur" düşüncəsi insanı riskli və düşünülməmiş qərarlar verməyə yönəldə bilər. Qısa yolla nəticə əldə etmək istəyən şəxs bəzən etik və ya təhlükəli seçimlərə meyl edə bilir.

Psixoloji baxımdan daha sağlam yanaşma isə prosesə fokuslanmaqdır. Uğuru bir nəticə kimi deyil, inkişaf yolu kimi qəbul etmək, kiçik nailiyyətləri dəyərləndirmək və səbrli olmaq insanın həm emosional sabitliyini qoruyur, həm də daha dayanıqlı uğurlar əldə etməsinə kömək edir".

Telegramda izləyin