"Aprel döyüşləri psixoloji üstünlük baxımından da mühüm rol oynadı" - DEPUTAT

"Aprel döyüşləri qısa müddətli olsa da, regionda hərbi-siyasi balansın dəyişməsinə ciddi təsir göstərdi və bu təsirlər bu gün də müəyyən dərəcədə hiss olunur. Əvvəla, bu döyüşlər göstərdi ki, mövcud vəziyyət sabit deyil və hər an dəyişə bilər. Bu, həm region ölkələri, həm də beynəlxalq aktorlar üçün mühüm siqnal oldu və təhlükəsizlik məsələlərinə yanaşmanı daha ciddi və ehtiyatlı etdi".

Bu sözləri Sonxeber.az-a Milli Məclisin deputatı Aydın Hüseynov danışıb.

O, açıqlamsında qeyd edib ki, Aprel döyüşləri hərbi güc faktorunun həlledici rolunu bir daha ön plana çıxardı:

"Bu təcrübə sonradan İkinci Qarabağ müharibəsi zamanı daha aydın şəkildə özünü göstərdi. Regionda təhlükəsizlik artıq yalnız diplomatiya ilə deyil, eyni zamanda real hərbi balansla müəyyən olunur.

Bu hadisələrlə bağlı Azərbaycan Respublikasının Prezidenti, Ali Baş Komandan İlham Əliyev də öz çıxışlarında qeyd edib ki, Aprel döyüşləri Azərbaycan Ordusunun gücünü, xalq-ordu birliyini və ölkənin öz torpaqlarını azad etmək əzmini bütün dünyaya nümayiş etdirdi. Bu qiymətləndirmə həmin döyüşlərin yalnız hərbi deyil, həm də siyasi və mənəvi baxımdan əhəmiyyətini göstərir. Digər tərəfdən, bu döyüşlərdən sonra texnologiyaya əsaslanan müharibə anlayışı daha da gücləndi. Müasir silahların və pilotsuz sistemlərin rolu artdı və bu da regionda hərbi modernləşməni sürətləndirdi.

Eyni zamanda, Aprel döyüşləri psixoloji üstünlük baxımından da mühüm rol oynadı. Bu hadisələr göstərdi ki, təşəbbüs əldə etmək mümkündür və bu, gələcək proseslərə birbaşa təsir edir. Nəticə etibarilə, Aprel döyüşləri həm hərbi strategiyaların yenilənməsinə, həm də siyasi qərarların daha praqmatik əsaslarla qəbul edilməsinə zəmin yaratdı. Bu günkü regional təhlükəsizlik mühitində onun təsirləri hələ də hiss olunur".

Vüsalə İbrahimli

Telegramda izləyin