Bu ölkəyə gedən turistlərin NƏZƏRİNƏ: sərxoşluq testindən keçiriləcəksiniz

Tailandda turistlərə spirtli içki satışı ilə bağlı yeni qaydalar tətbiq olunub. Yeni tələblərə əsasən, satıcılar alkoqol almaq istəyən şəxslərin sərxoşluq səviyyəsini yoxlamaq hüququ əldə ediblər. Əgər yoxlama nəticəsində müştərinin artıq sərxoş olduğu müəyyən edilərsə, ona xidmət göstərilməyəcək.

Lent.az xarici mediaya istinadla xəbər verir ki, yeni qaydalara görə, şəxs alkoqol qəbul etdikdən sonra hərəkət koordinasiyasında açıq pozuntular göstərirsə, tarazlığını saxlamaqda çətinlik çəkirsə, qeyri-sabit davranırsa və ya onun danışığı və davranışı özü və ətrafdakılar üçün təhlükə yaradırsa, o, sərxoş hesab olunur. Bundan əlavə, şəxsdən spirt qoxusu gəlməsi ilə yanaşı gözlərin qızarması və ya titrəməsi, qeyri-sabit yeriş və ya titrəmə, anlaşılmaz və ya qarışıq nitq, əhval dəyişikliyi, aqressiv və ya dağıdıcı davranış, uyğun olmayan hərəkətlər, eləcə də şüurun zəifləməsi kimi əlamətlər də sərxoşluğun göstəricisi sayılır.

Qaydalar çərçivəsində sərxoşluğu müəyyən etmək üçün üç praktik test üsulu da təqdim olunub. Bu testlərdən hər hansı biri satıcı tərəfindən tətbiq oluna bilər. Birinci üsul barmağı buruna toxundurma testidir ki, bu zaman şəxs gözlərini yumaraq barmağını burnunun ucuna dəyməlidir və ciddi səhv və ya titrəmə sərxoşluq əlaməti kimi qiymətləndirilir.

İkinci üsul yerimə və dönmə testidir, burada şəxs düz xətt üzrə addımlamalı və geri qayıtmalıdır, balansın itirilməsi və ya xəttdən çıxma kimi hallar sərxoşluğa işarə edir. Üçüncü üsul isə bir ayaq üzərində dayanma testidir; şəxs bir ayaq üstə dayanaraq müəyyən müddət saymalıdır və tarazlığın itirilməsi sərxoşluq kimi qiymətləndirilir.

Rəsmilər bildirirlər ki, bu yeniliklər spirtli içkilərin daha məsuliyyətli şəkildə satılmasını təmin etməyə və ictimai təhlükəsizliyi artırmağa yönəlib. Yeni və aydın meyarların tətbiqi satıcılara daha düzgün qərar verməyə kömək edəcək və ictimai yerlərdə alkoqolla bağlı insidentlərin qarşısını almağa xidmət edəcək.

Telegramda izləyin