Yeni doğulan körpəyə kitab oxumaq onun inkişafına necə təsir göstərir? - AÇIQLAMA

Valideynlik dövründə ən çox verilən suallardan biri də körpə hələ heç nə anlamırsa, ona kitab oxumağın nə qədər faydalı olub-olmamasıdır.

İlk baxışda sadə və əhəmiyyətsiz görünən bu vərdiş əslində uşağın həm beyin, həm də emosional inkişafında düşündüyümüzdən daha böyük rol oynayır.

Bəs görəsən körpələrə kitab oxumaq onların gələcək inkişafına necə təsir göstərir?

Psixoloq Gülsər Qədirli bu barədə Sonxeber.az -a açıqlama verib:

"Körpələr doğulduqları andan etibarən ətraf mühiti aktiv şəkildə qavramağa başlayırlar. Onlar sözləri başa düşməsələr belə, səsləri, intonasiyanı, ritmi və emosiyanı hiss edirlər. Bu baxımdan erkən yaşda kitab oxumaq bir neçə istiqamətdə mühüm rol oynayır.

İlk növbədə, bu, dil və nitq inkişafının təməlini qoyur. Körpə valideynin səsini dinlədikcə yeni səslərə öyrəşir, beyin həmin səsləri yadda saxlayır və gələcəkdə danışıq bacarıqlarının formalaşmasına zəmin yaranır. Eyni zamanda, kitab oxumaq emosional bağın güclənməsinə kömək edir. Uşaq valideynin qucağında olarkən onun səsini dinləyir, özünü təhlükəsiz və rahat hiss edir. Bu isə uşağın psixoloji sabitliyi və güvən hissi üçün çox vacibdir.

Bu vərdiş diqqət və yaddaşın inkişafına da müsbət təsir edir. Körpə şəkillərə baxdıqca, səsləri dinlədikcə diqqətini cəmləməyi öyrənir. Hətta sadə şəkilli kitablar belə onun vizual qavrayışını gücləndirir. Erkən yaşda kitabla tanışlıq gələcəkdə oxumağa marağın formalaşmasına səbəb olur. Belə uşaqlar böyüdükcə kitabı daha rahat qəbul edir və öyrənməyə daha açıq olurlar.

Yəni, körpə hələ anlamır deyə kitab oxumağı təxirə salmaq düzgün yanaşma deyil. Əksinə, bu dövr uşağın beyin inkişafının ən aktiv mərhələsidir və məhz bu zaman edilən belə sadə addımlar onun gələcək intellektual və emosional inkişafına güclü təsir göstərir".

Telegramda izləyin