Dərəyə düşən 3 yaşlı uşaq həyatını itirib

Türkiyənin Karaman vilayətində 3 yaşlı uşağın faciəvi ölümü ilə nəticələnən hadisə baş verib.

Sonxeber.az türk mediasına istinadən xəbər verir ki, hadisə vilayətin Gülkaya kəndində qeydə alınıb. Dünən axşam saatlarında evlərinin qarşısında oyun oynayan 3 yaşlı Bayram Əli Şimşək bir müddət sonra yoxa çıxıb. Uşağı öz imkanları ilə tapa bilməyən ailə dərhal aidiyyəti qurumlara məlumat verib.

Hadisə yerinə jandarma, təcili tibbi yardım və Fövqəladə Hallar Agentliyinin (AFAD) əməkdaşları cəlb olunub. Kənd sakinlərinin də qoşulduğu axtarışlar nəticəsində uşağın meyiti qısa müddət sonra evlərindən təxminən 500 metr aralıda yerləşən dərədə aşkar edilib.

İlkin ehtimallara görə, uşağın dərəyə yıxılaraq boğulduğu bildirilir. Meyit müayinə olunmaq üçün Karaman Təhsil və Araşdırma Xəstəxanasının morquna təhvil verilib.

Faktla bağlı araşdırma aparılır.

Telegramda izləyin