5 günlük körpəyə zorakılıq edən tibb bacısı məhkəmədə hakimə yalvardı - VİDEO

Türkiyənin Kahramanmaraş şəhərində 5 günlük körpəyə qarşı zorakılıq göstərdiyi iddia olunan tibb bacısı məhkəmə qarşısına çıxarılıb.

Sonxeber.az xarici mediaya istinadən xəbər verir ki, hadisə Kahramanmaraş Sütçü İmam Üniversitesi Sağlık Uygulama ve Araştırma Hastanesi nəzdində fəaliyyət göstərən Yenidoğulmuşların Reanimasiya Bölməsində baş verib. 2021-ci ilin 26 may tarixində müalicə alan 5 günlük Deniz Esin Bozoklar adlı körpəyə qarşı zorakılıq edildiyi iddiaları ilə bağlı araşdırma başladılıb.

İş məhkəməyə göndərildikdən sonra tibb bacısı H.D.B.-nin körpəyə qarşı fiziki zorakılıq göstərdiyi anların görüntüləri ortaya çıxıb. Bundan sonra onun barəsində həbs qərarı verilib.

Kahramanmaraş 10. Asliye Ceza Mahkemesində keçirilən iclasda təqsirləndirilən şəxs SEGBİS sistemi vasitəsilə məhkəməyə qoşulub.

Hakimin suallarını cavablandıran keçmiş tibb bacısı bildirib ki, məqsədi körpəyə zərər vermək olmayıb:

"Xəstəyə bilərəkdən zərər vermək niyyətim olmayıb, məqsədim müalicə etmək idi. Baş verən hadisəyə görə çox peşmanam və bu peşmançılığı ömür boyu yaşayacağam. Həbsiz mühakimə olunmağımı xahiş edirəm. Mənim uşağın xəstəliyi ilə bağlı heç bir əlaqəm yoxdur. Təxminən 4 aydır öz övladımdan da ayrı qalmışam. Ev dustaqlığı və ya digər nəzarət tədbirləri tətbiq edilə bilər", - deyə o bildirib.

Təqsirləndirilən şəxsin vəkili Mustafa Çaprak onun həbs qətimkan tədbirinin dəyişdirilməsini istəyib. Körpənin ailə vəkili isə əvvəlki mövqeyini təkrarlayaraq həbsin davam etdirilməsini tələb edib.

Məhkəmə tibb bacısı H.D.B.-nin həbsdə qalmasına qərar verib. İş üzrə növbəti məhkəmə iclası Ədli Tibb Qurumu tərəfindən təqdim olunacaq ekspertiza rəyinin gözlənilməsi səbəbindən 3 iyul tarixinə təxirə salınıb.

Telegramda izləyin