Ölkəni ayağa qaldıran hücumun detalları üzə çıxıb - VİDEO

İrlandiyanın paytaxtı Belfast şəhərində baş verən bıçaqlı hücum ölkədə geniş rezonans doğurub.

Sonxeber.az xarici mediaya istinadla xəbər verir ki, hadisəni törədən şəxsin afrikalı miqrant olduğu iddia edilir. Bəzi şahidlər hücumçunun zərərçəkəni öldürməyə çalışdığını, hətta onun başını kəsməyə cəhd etdiyini irəli sürsələr də, bu məlumatlar hələlik rəsmi şəkildə təsdiqlənməyib.

Sosial şəbəkələrdə yayılan görüntülərdə hücumçunun yerdə uzanan şəxsin üzərində olduğu görünür. Hadisəni görən ətrafdakı vətəndaşlar dərhal müdaxilə edərək hücumçunu zərərçəkəndən uzaqlaşdırmağa çalışıblar. Kadrlarda hadisə yerində böyük təşviş yaşandığı, bir neçə nəfərin birlikdə hücumçunu zərərsizləşdirdiyi əks olunub.

Müdaxilədən sonra yaralı şəxsə tibbi yardım göstərilməsi üçün təcili yardım çağırılıb. Kuzey İrlandiya Polis Xidməti (PSNI) hadisə nəticəsində bir nəfərin ağır xəsarətlərlə xəstəxanaya çatdırıldığını açıqlayıb.

Polis həmçinin hücumla əlaqədar bir şübhəlinin saxlanıldığını və hadisənin başvermə səbəblərinin araşdırıldığını bildirib. Ərazidə əlavə təhlükəsizlik tədbirləri görülüb və genişmiqyaslı istintaq başladılıb.

Hadisənin görüntülərinin sosial mediada yayılmasından sonra Belfastdakı hücum geniş müzakirələrə səbəb olub. Xüsusilə hücumçunun kimliyi və miqrasiya statusu ilə bağlı çoxsaylı paylaşımlar edilib, bəzi istifadəçilər hadisənin ölkədəki miqrasiya siyasəti ilə bağlı mübahisələri yenidən gündəmə gətirdiyini qeyd ediblər.

Bununla yanaşı, polis araşdırma başa çatana qədər təsdiqlənməmiş məlumatların yayılmamasına çağırış edib. Hüquq-mühafizə orqanları hadisənin bütün təfərrüatlarını araşdırmağa davam edir. Yetkililərin yaxın günlərdə hücumçunun şəxsiyyəti, motivi və hadisənin detalları barədə əlavə məlumat verməsi gözlənilir.

Telegramda izləyin