"Milli Qurtuluş Günü müasir Azərbaycanın uğurlarının təməlində dayanan siyasi fəlsəfənin təntənəsidir" - DEPUTAT

"Azərbaycan xalqının taleyində elə tarixi günlər var ki, onlar təkcə müəyyən bir dövrün hadisəsi deyil, bütöv bir xalqın gələcəyini müəyyənləşdirən dönüş nöqtəsi kimi qiymətləndirilir. 1993-cü il iyunun 15-i məhz belə günlərdən biridir. Bu tarix Azərbaycan dövlətçiliyinin məhv olmaq təhlükəsindən xilas edildiyi, xalqın iradəsinin təcəssüm etdiyi və ölkənin inkişaf yoluna qədəm qoyduğu gün kimi Milli Qurtuluş Günü adı ilə tariximizə həkk olunub".

Bu sözləri Sonxeber.az-a Milli Məclisin deputatı Mahir Süleymanlı danışıb.

O, açıqlamasında qeyd edib ki, XX əsrin sonlarında yenidən dövlət müstəqilliyini bərpa edən Azərbaycan çox mürəkkəb və ziddiyyətli bir mərhələdən keçirdi:

"Həmin dövrdə ölkə eyni zamanda üç istiqamətdə ağır sınaqlarla üz-üzə qalmışdı: sovet imperiyasının miras qoyduğu asılılıqdan tam qurtularaq müstəqilliyi möhkəmləndirmək, Ermənistanın hərbi təcavüzünə qarşı mübarizə aparmaq və ölkəni vətəndaş qarşıdurması təhlükəsindən xilas etmək. Dərin siyasi böhran, idarəetmədə xaos, iqtisadi tənəzzül və hakimiyyət uğrunda mübarizə dövlətçiliyin əsaslarını sarsıdır, Azərbaycanın gələcəyini ciddi təhlükə altına qoyurdu.

Belə bir mürəkkəb şəraitdə xalqın təkidli tələbi ilə Ümummilli Lider Heydər Əliyevin yenidən hakimiyyətə qayıdışı Azərbaycanın taleyində həlledici rol oynadı. 1993-cü il iyunun 15-də Azərbaycan Ali Sovetinin Sədri seçilən Heydər Əliyev böyük məsuliyyəti öz üzərinə götürərək ölkəni fəlakətdən xilas etmək missiyasına başladı. Məhz həmin gündən etibarən Azərbaycanda sabitliyin və dövlət quruculuğunun möhkəm təməli formalaşdırıldı.

Heydər Əliyevin siyasi uzaqgörənliyi, zəngin dövlətçilik təcrübəsi və qətiyyəti sayəsində qısa müddətdə ölkədə ictimai-siyasi sabitlik təmin olundu, vətəndaş müharibəsi təhlükəsi aradan qaldırıldı, dövlət institutlarının fəaliyyəti bərpa edildi. Azərbaycan parçalanmaq və müstəqilliyini itirmək təhlükəsindən xilas oldu. Xalqın milli birliyi möhkəmləndirildi, azərbaycançılıq ideologiyası ümummilli həmrəyliyin əsasına çevrildi".

Deputat onu da vurğuladı ki, Milli Qurtuluşun gətirdiyi sabitlik sonrakı illərdə ölkənin hərtərəfli inkişafına geniş imkanlar yaratdı:

"Dövlət idarəçiliyi sistemi təkmilləşdirildi, hüquqi və demokratik institutların formalaşdırılması istiqamətində mühüm addımlar atıldı, Azərbaycanın beynəlxalq əlaqələri genişləndi və ölkəmizin dünya birliyində mövqeyi gücləndi. Respublikamızın informasiya blokadasından çıxarılması, beynəlxalq ictimaiyyətə Azərbaycan həqiqətlərinin çatdırılması istiqamətində görülən işlər də məhz həmin dövrdə öz nəticələrini verməyə başladı.

Milli Qurtuluş Günü təkcə keçmişə ehtiram deyil, həm də müasir Azərbaycanın uğurlarının təməlində dayanan siyasi fəlsəfənin təntənəsidir. Bu gün Azərbaycanın qazandığı nailiyyətlər, beynəlxalq nüfuzunun yüksəlməsi, iqtisadi qüdrətinin artması və dövlət müstəqilliyinin daha da möhkəmlənməsi həmin qurtuluş missiyasının məntiqi nəticəsi kimi qiymətləndirilir.

Ümummilli Lider Heydər Əliyevin müəyyən etdiyi inkişaf strategiyası bu gün Prezident İlham Əliyev tərəfindən uğurla davam etdirilir. Prezident İlham Əliyevin müdrik və uzaqgörən siyasəti nəticəsində Azərbaycan regionun aparıcı dövlətinə çevrilib, ərazi bütövlüyünü və suverenliyini tam bərpa edib, beynəlxalq münasibətlər sistemində söz sahibi olan güclü dövlət kimi mövqeyini daha da möhkəmləndirib. Dövlət başçısının rəhbərliyi ilə həyata keçirilən məqsədyönlü siyasət ölkəmizin davamlı inkişafını təmin edir, xalqımızın rifahının yüksəldilməsinə və Azərbaycanın dünya miqyasında nüfuzunun artmasına xidmət edir.

Bu baxımdan, 15 İyun - Milli Qurtuluş Günü yalnız tarixi bir hadisənin ildönümü deyil, həm də Azərbaycan dövlətinin gücünün, xalqın milli iradəsinin və müstəqil dövlətçilik ənənələrinin təntənəsinin parlaq ifadəsidir".

Vüsalə İbrahimli

Telegramda izləyin