Futbol matçında qorxulu anlar: Yanan kamera tribunaların önünə düşdü - VİDEO

Macarıstan və Qazaxıstan milli komandaları arasında keçirilən yoldaşlıq görüşü zamanı gözlənilməz hadisə yaşanıb. Oyunun gedişində stadionun dam konstruksiyasına bərkidilmiş yayım kamerası texniki nasazlıq səbəbindən alovlanaraq aşağı düşüb.

Sonxeber.az xarici mediaya istinadən xəbər verir ki, hadisə zamanı kamera sahə kənarına düşərək stadionda böyük təşviş yaradıb. Futbolçular, texniki heyət və azarkeşlər baş verənləri heyrətlə izləyiblər. Qısa müddət ərzində təhlükəsizlik və yanğınsöndürmə əməkdaşları hadisə yerinə cəlb olunaraq vəziyyəti nəzarət altına alıblar.

Xoşbəxtlikdən insident nəticəsində xəsarət alan olmayıb. Bununla belə, hadisənin baş verdiyi əraziyə yaxın şəxslərin olması səbəbindən mümkün faciənin qarşısının son anda alındığı bildirilir.

Hadisənin səbəblərinin araşdırıldığı, texniki nasazlığın dəqiq mənbəyinin müəyyənləşdirilməsi üçün ekspertlərin iş apardığı qeyd olunub.

Qeyd edək ki, insident oyunun önünə keçərək matçın əsas müzakirə mövzusuna çevrilib.

Telegramda izləyin