Mütəxəssis çavuş bar əməkdaşlarını güllələdi: Görün hansı səbəbdən

Türkiyənin Adana şəhərində məzuniyyətdə olan bir mütəxəssis çavuş bar əməkdaşları ilə yaşadığı mübahisə zamanı iki nəfəri xidməti tapançası ilə yaralayıb.

Sonxeber.az xarici mediaya istinadla xəbər verir ki, hadisə Seyhan rayonunun Kurtuluş məhəlləsində yerləşən əyləncə məkanlarından birində baş verib. Məlumata görə, Hakkaridə xidmət edən Mehmet C. adlı mütəxəssis çavuş bardan çıxarkən qadın əməkdaş Buse S.-ni özü ilə aparmaq istəyib. Qadının bu təklifi rədd etməsindən sonra tərəflər arasında mübahisə yaranıb.

Mübahisəyə müdaxilə edən iş yeri əməkdaşı Muhammet Ş. ilə şübhəli arasında da qarşıdurma yaşanıb. Qısa müddətdə davaya çevrilən hadisə zamanı Mehmet C. xidməti tapançasından atəş açaraq hər iki əməkdaşı yaralayıb.

Yaralanan şəxslər xəstəxanaya çatdırılıb. Hadisə yerindən qaçmağa çalışan şübhəli isə ərazidə xidmət aparan yol polisi tərəfindən saxlanılıb.

İfadəsində sərxoş olduğunu və hadisəni xatırlamadığını bildirən Mehmet C. polis bölməsindəki əməliyyatlardan sonra məhkəmə qərarı ilə həbs edilərək istintaq təcridxanasına göndərilib.

Hadisə ilə bağlı araşdırma davam edir.

Telegramda izləyin