Məzuniyyət mərasimində müəllimin tələbəyə etdiyi hərəkət günlərdir tənqid edilir - VİDEO

Kanadada keçirilən məzuniyyət mərasimində müəllimin fələstinli tələbənin kefiyəsini çıxarması sosial mediada geniş etirazlara səbəb olub.

Sonxeber.az xarici mediaya istinadla xəbər verir ki, yayılan görüntülərdə diplomunu almaq üçün səhnəyə çıxan fələstinli tələbənin məzuniyyət mantiyasının üzərindən taxdığı kefiyənin səhnədə olan müəllim tərəfindən qəfil çəkilərək çıxarıldığı görünür. Tələbə qısa müddət çaşqınlıq yaşasa da, mərasim davam edib.

Görüntülərin yayılmasından sonra çoxsaylı sosial media istifadəçiləri müəllimin davranışını tənqid edərək, kefiyənin bir çox fələstinli üçün mədəni kimliyin və həmrəyliyin simvolu olduğunu bildiriblər.

Qeyd olunur ki, İsrail-Qəzza müharibəsindən sonra dünyanın müxtəlif universitetlərində kefiyədən istifadə və Fələstinə dəstək aksiyaları ilə bağlı oxşar mübahisələr yaşanır. Bəzi təhsil müəssisələri bunu siyasi simvol kimi qiymətləndirsə də, tələbələr və insan hüquqları müdafiəçiləri kefiyənin eyni zamanda mədəni kimliyin ifadəsi olduğunu vurğulayırlar.
Hadisə ilə bağlı təhsil müəssisəsi hələlik rəsmi açıqlama verməyib.

Telegramda izləyin