Lisenziyası ləğv edilən plastik cərrah hovuzda ölü tapıldı

ABŞ-ın Kaliforniya ştatında keçmişdə estetik əməliyyatdan sonra bir pasiyentin ölümünə görə həkimlik lisenziyası ləğv edilən 71 yaşlı plastik cərrah Sarva Aldoori yaşadığı evin hovuzunda ölü tapılıb.

Sonxeber.az xarici mediaya istinadla xəbər verir ki, hadisə Bakersfild şəhərində baş verib. Polis həkimin ölüm səbəbinin hələ müəyyən edilmədiyini, onun hovuza necə düşdüyü və hadisədə kriminal əlamətin olub-olmadığı ilə bağlı araşdırmaların davam etdiyini bildirib.

35 il ginekologiya, mamalıq və estetik cərrahiyyə sahəsində çalışan Aldoori 2016-cı ildə liposaksiya və qarın gərmə əməliyyatından sonra bir pasiyentin yağ emboliyası nəticəsində ölməsinə görə intizam məsuliyyətinə cəlb olunmuşdu. Daha sonra əməliyyatı aparmaq üçün kifayət qədər ixtisaslı olmadığı müəyyən edilmiş, 2024-cü ildə isə nəzarət şərtlərini pozduğu üçün həkimlik lisenziyası əlindən alınmışdı.

Aldoorinin ölümü estetik əməliyyatlarla bağlı ölüm hallarının yenidən gündəmə gəldiyi bir vaxta təsadüf edib.

Telegramda izləyin