Xəstəxanadan "əzələ ağrısı" diaqnozu ilə evə göndərdilər, yolda ürəyi dayandı

Türkiyənin Giresun vilayətində infarkt əlamətləri ilə özəl xəstəxanaya müraciət edən Salih Aydın ilkin müayinədən sonra "əzələ ağrısı" diaqnozu ilə evə buraxılıb. Lakin o, xəstəxanadan ayrıldıqdan bir neçə dəqiqə sonra avtomobildə halı pisləşərək ürəyi dayanıb.

Sonxeber.az xarici mediaya istinadla xəbər verir ki, xəstə "qırmızı kod"la yenidən eyni xəstəxanaya çatdırılıb. Həkimlər elektroşok və ürək masajı tətbiq etdikdən sonra təcili angioqrafiya apararaq stent yerləşdiriblər. Hazırda onun reanimasiya şöbəsində müalicəsinin davam etdiyi bildirilir.

Hadisədən sonra ailə ilkin tibbi yardımın lazımi səviyyədə göstərilmədiyini iddia edərək aidiyyəti qurumlara şikayət edib.

Şikayət əsasında Türkiyə Səhiyyə Nazirliyi araşdırma aparıb və ilkin yoxlamanın nəticələrinə əsasən hadisə ilə bağlı məsul səhiyyə işçisi haqqında rəsmi istintaqın başlanmasına icazə verib. Faktla bağlı inzibati və hüquqi araşdırmalar davam edir.

Telegramda izləyin