Xaricə getmək istəyənlərə ŞAD XƏBƏR: Aviabiletlər daha ƏLÇATAN OLACAQ

Azərbaycandan birbaşa beynəlxalq uçuşların artırılması və aşağıbüdcəli aviaşirkətlərin bazara daxil olması aviabiletlərin qiymətlərinin daha rəqabətli formalaşmasına imkan yarada bilər. Hazırda Heydər Əliyev Beynəlxalq Aeroportunda 40 aviaşirkət fəaliyyət göstərir və onların bir hissəsi low-cost və ya hibrid model üzrə işləyir, uçuş şəbəkəsinin genişləndirilməsi də davam edir.

Bəs, birbaşa uçuşların və aşağıbüdcəli aviaşirkətlərin sayının artırılması aviabiletləri nə dərəcədə ucuzlaşdıra bilər və bu, həm Azərbaycana gələn turistlərin sayına, həm də vətəndaşların xaricə səfər imkanlarına necə təsir göstərə bilər?
Mövzu ilə bağlı Sonxeber.az-a açıqlama verən Azərbaycan Turizm Agentlikləri Assosiasiyasının Turistlərə Maarifləndirmə və Dəstək şöbəsinin rəhbəri, turizm eksperti Rəhman Quliyev bildirib ki, Azərbaycanda birbaşa beynəlxalq uçuşların sayının artırılması və aşağıbüdcəli aviaşirkətlərin ölkə bazarına cəlb edilməsi ilk növbədə aviabiletlərin qiymətlərinin daha əlçatan olmasına müsbət təsir göstərə bilər.

"Bazarda aviaşirkətlərin və istiqamətlərin sayının artması rəqabəti gücləndirərək qiymətlərin optimallaşmasına şərait yaradacaq. Bu isə həm ölkə vətəndaşlarının daha münasib qiymətlərlə xaricə səyahət imkanlarını genişləndirəcək, həm də Azərbaycana gələn turistlərin səyahət xərclərini azaldacaq. Xüsusilə Avropa, Asiya və Yaxın Şərq istiqamətlərinə birbaşa uçuşların artırılması Azərbaycanın turizm bazarına yeni turist seqmentlərinin cəlb olunmasına imkan verə bilər".

Ekspert bildirib ki, aşağıbüdcəli aviaşirkətlərin fəaliyyəti yalnız qiymət baxımından deyil, yeni marşrutların açılması və uçuş tezliyinin artırılması baxımından da mühüm əhəmiyyət daşıyır:

"Bununla yanaşı, turist axınının artması üçün uçuşların sayının artırılması ilə paralel olaraq ölkədə xidmət keyfiyyəti, hotel infrastrukturu və qiymət siyasəti də təkmilləşdirilməlidir. Düşünürəm ki, düzgün marşrut strategiyası və rəqabətli tariflər tətbiq olunarsa, bu addımlar Azərbaycana xaricdən turist axınının əhəmiyyətli dərəcədə artmasına real imkan yarada bilər. Eyni zamanda, aviasiya əlçatanlığının yüksəlməsi Azərbaycanın regional turizm və nəqliyyat mərkəzi kimi mövqeyinin daha da güclənməsinə xidmət edəcək".

Röyalə Xəyal

Telegramda izləyin