Qəssabda 400 kiloqram xarab ət aşkarlandı

Türkiyənin Bodrum rayonunda ətrafa yayılan pis qoxu ilə bağlı edilən şikayət əsasında hərəkətə keçən bələdiyyə zabitləri bağlı vəziyyətdə olan qəssab dükanının anbarında təxminən 400 kiloqram xarab ət aşkarlayıb.

Sonxeber.az xarici mediaya istinadla xəbər verir ki, hadisə Bodrumun Gümbet məhəlləsi, Sadi Irmak küçəsində baş verib. Ərazidə hiss olunan kəskin pis qoxu ilə bağlı Bodrum Bələdiyyəsinin Zabıta Müdirliyinə məlumat daxil olub.

Aidiyyatı şəxslər ünvana gedərək araşdırmaya başlayıblar. Yoxlama zamanı qoxunun həmin vaxt bağlı olan qəssab mağazasının anbarından gəldiyi müəyyən edilib.

Anbarda aparılan ətraflı yoxlama nəticəsində xarab olduğu və ətrafa pis qoxu yaydığı müəyyən edilən təxminən 400 kiloqram ət aşkarlanıb. İnsan sağlamlığı üçün risk yarada biləcək məhsulların istifadəsinin qarşısını almaq məqsədilə ətlərə zabitlər tərəfindən əl qoyulub.

Təxminən 400 kiloqram ət lazımi prosedurlardan sonra məhv edilmək üçün anbardan çıxarılıb. Məhsulların məhv edilməsi prosesi də zabitlərin nəzarəti altında həyata keçiriləcək.

Bələdiyyə əməkdaşları bununla yanaşı, qəssab dükanı ilə bağlı müvafiq protokollar tərtib edib. Müəssisə barəsində qüvvədə olan qanunvericiliyə uyğun olaraq inzibati tədbir görülməsi üçün proses başladılıb.

Telegramda izləyin