Ermənistanla münasibətlərin normallaşdırılması ölkəmizin beynəlxalq mövqeyini daha da möhkəmləndirib

"Azərbaycan Prezidentinin Şanxay Əməkdaşlıq Təşkilatının tədbirində iştirak etmək üçün Qırğızıstana səfəri ölkəmizin həm Mərkəzi Asiyada, həm də qlobal müstəvidə artan rolunun göstəricisidir. Azərbaycanın bu tədbirdə iştirakı xüsusi əhəmiyyət daşıyır. Ölkəmiz Cənubi Qafqazda mühüm mövqeyə malik olmaqla yanaşı, Avropanın enerji təhlükəsizliyinin təmin olunmasında da əhəmiyyətli rol oynayır və son illərdə diplomatik imkanlarını əhəmiyyətli dərəcədə genişləndirib".

Bunu Sonxeber.az-a açıqlamasında politoloq Elşad Həsənov bildirib.

O, bildirib ki, Azərbaycanın son illərdə əldə etdiyi nailiyyətlər, xüsusilə Ermənistanla münasibətlərin normallaşdırılması və sülh prosesində əldə olunan irəliləyişlər ölkəmizin beynəlxalq mövqeyini daha da möhkəmləndirib"

"Şanxay Əməkdaşlıq Təşkilatının tədbiri çərçivəsində Azərbaycan Prezidentinin bir sıra ölkələrin liderləri ilə görüşləri də diqqət çəkir. Türkiyə Prezidenti Rəcəb Tayyib Ərdoğan, Rusiya Prezidenti Vladimir Putin, Hindistanın Baş naziri Narendra Modi, Qazaxıstan Prezidenti Kasım-Jomart Tokayev və digər dövlət rəhbərləri ilə keçirilən görüşlər Azərbaycanın beynəlxalq əlaqələrinin genişliyini göstərir. Eyni zamanda, Mərkəzi Asiya ölkələri ilə Azərbaycan arasında yeni geosiyasi və geoiqtisadi reallıq formalaşır. Mərkəzi Asiya dövlətlərinin resurslarının və məhsullarının Azərbaycan üzərindən dünya bazarlarına çıxarılması istiqamətində mühüm imkanlar yaranıb. Bu prosesdə Azərbaycanın nəqliyyat və logistika infrastrukturu xüsusi rol oynayır".

Politoloq bildirib ki, bu baxımdan Ələt Beynəlxalq Dəniz Ticarət Limanının genişləndirilməsi mühüm əhəmiyyət daşıyır:

"Limanın yükötürmə imkanlarının artırılması, eləcə də Xəzər dənizində Azərbaycan və Özbəkistanın birgə gəmiçilik imkanlarının inkişaf etdirilməsi Mərkəzi Asiya ilə Azərbaycan arasında nəqliyyat bağlantılarının daha da güclənməsinə xidmət edir. Bütün bunlar Azərbaycanın Mərkəzi Asiya ölkələri ilə daha sıx inteqrasiyasına şərait yaradır. Nəticədə Azərbaycan regionlararası ticarət və nəqliyyat marşrutlarında mühüm bağlantı mərkəzinə çevrilir. Bu isə ölkəmizin beynəlxalq mövqeyinin və iqtisadi imkanlarının daha da güclənməsinə səbəb olur. Səfər çərçivəsində Azərbaycan Prezidenti İlham Əliyevin Ermənistanın Baş naziri Nikol Paşinyanla görüşü də xüsusi əhəmiyyət daşıyır. Görüş zamanı Azərbaycan-Ermənistan münasibətlərinin gələcək inkişafı və sülh prosesinin davam etdirilməsi ilə bağlı məsələlər müzakirə olunub".

Onun sözlərinə görə, bu görüşün beynəlxalq mediada geniş diqqət çəkməsi də Azərbaycan və Ermənistan arasında sülh prosesinin regional və qlobal əhəmiyyətini göstərir:

"Cənubi Qafqazda davamlı sülhün və sabitliyin təmin olunması istiqamətində atılan addımlar Azərbaycanın beynəlxalq mövqeyinin möhkəmlənməsinə də müsbət təsir göstərir. Ümumilikdə, Azərbaycanın son illərdə həyata keçirdiyi xarici siyasət ölkənin həm Mərkəzi Asiya dövlətləri ilə münasibətlərinin inkişafına, həm də dünya siyasətində rolunun artmasına şərait yaradıb. Azərbaycan-Mərkəzi Asiya əməkdaşlığının genişlənməsi gələcəkdə həm ölkəmiz, həm də region dövlətləri üçün mühüm iqtisadi imkanlar vəd edir".

Röyalə Xəyal

Telegramda izləyin