118 illik sualtı sirr HƏLL OLUNDU

Dalğıclar bu yaxınlarda Uayt adası sahillərində Britaniya Kral Hərbi Dəniz Qüvvələrinə məxsus döyüş gəmisinin qalıqlarını aşkarlayıblar. Gəmi batdıqdan düz 118 il sonra tapılıb.

Lent.az xarici mediaya istinadla xəbər verir ki, "HMS Tiger" 1908-ci ildə Kral Hərbi Dəniz Qüvvələrinin digər hərbi gəmisi, 10 min tonluq "HMS Berwick" ilə toqquşduqdan sonra batıb.

"HMS Tiger"in 57 nəfərlik ekipajının yarıdan çoxu qəza zamanı həlak olub.

Gəminin qalıqları 2026-cı ilin avqustuna qədər aşkarlanmayıb. Avqustda ProjectXplore dalğıc qrupu onların yerini müəyyən etdiyini açıqlayıb. Komanda beş il ərzində arxiv materiallarını araşdırıb və batmış gəminin yerini müəyyənləşdirməyə kömək edən məlumatlar toplayıb.

ProjectXplore təşkilatçıları bunu "HMS Tiger"in qalıqlarını araşdırmaq, aşkar etmək və sənədləşdirmək üçün unikal imkan adlandırıblar.

Qeyd edilir ki, bu kəşf Britaniya hökumətinin Silahlı Qüvvələr haqqında qanun layihəsi çərçivəsində batmış hərbi gəmilərin hüquqi müdafiəsini gücləndirmək niyyətində olduğu bir vaxta təsadüf edib.

Təklif olunan dəyişikliklərə əsasən, "HMS Tiger" kimi batmış hərbi gəmilər aşkar edildiyi andan qoruma altına alınacaq. İcazəsiz olaraq bu gəmilərə zərər vurmaq və ya onlardan hər hansı əşya götürmək qanunsuz sayılacaq. Dalğıclara isə "bax, amma toxunma" prinsipi ilə belə gəmiləri ziyarət etməyə icazə veriləcək.

"HMS Tiger" son illərdə Britaniya sularında aşkar edilən və ya sənədləşdirilən tarixi batmış gəmilərdən biridir.

Telegramda izləyin