"Azərbaycanın beynəlxalq aləmdəki nüfuzu daha da artıb" - AÇIQLAMA

Azərbaycan Respublikasının Prezidenti cənab İlham Əliyevin nüfuzu, siyasi iradəsi, uzaqgörənliyi və strateji addımları ölkəmizin yeni dünya düzəninin formalaşdığı bir dövrdə orta güc dövlət kimi mövqeyinin möhkəmlənməsini təmin edir. Prezident İlham Əliyevin müstəqil, ardıcıl və prinsipial siyasəti nəticəsində Azərbaycan öz ərazi bütövlüyünü və suverenliyini tam bərpa edib.
Bu, müasir tariximizin ən böyük nailiyyətidir. Əslində, dövlətin gücü yalnız onun ərazisinin böyüklüyü, əhalisinin sayı və ya iqtisadi imkanları ilə ölçülmür. Dövlətin real gücü, eyni zamanda, milli maraqlarını necə qorumasından, müstəqil qərarlar qəbul etmək imkanından və beynəlxalq münasibətlər sistemində öz sözünü necə deməsindən asılıdır. Xalqımız xoşbəxtdir ki, Ulu Öndər Heydər Əliyevin siyasi məktəbinin layiqli davamçısı olan Prezident İlham Əliyev dövlətimizin rəhbərliyini milli maraqları əsas götürərək davam etdirir.
Son 23 ilin nəticələrinə nəzər saldıqda ilk növbədə 30 ilə yaxın müddətdə işğal altında qalmış torpaqlarımızın azad edilməsini görürük. Azərbaycan bir vaxtlar işğala məruz qalmış, yüz minlərlə insanın qaçqın və məcburi köçkün vəziyyətinə düşdüyü, beynəlxalq platformalarda ərazilərinin azad olunması üçün dəstək axtaran ölkə idi. Bu gün isə Azərbaycan öz gücünə, hərbi və siyasi iradəsinə arxalanaraq ərazi bütövlüyünü və suverenliyini bərpa etmiş qalib dövlətdir.
Bu tarixi nailiyyət Prezident İlham Əliyevin uzun illər ərzində həyata keçirdiyi məqsədyönlü siyasətin nəticəsidir. Dövlət başçısının uzaqgörən siyasəti nəticəsində Azərbaycan yalnız ərazilərini işğaldan azad etmədi, həm də həmin ərazilərdə genişmiqyaslı bərpa və quruculuq işlərinə başladı. Keçmiş məcburi köçkünlərin öz doğma torpaqlarına qayıdışının təmin olunması, şəhər və kəndlərin yenidən qurulması, müasir infrastrukturun yaradılması Azərbaycanın qarşısında yeni inkişaf perspektivləri açır.
Eyni zamanda, Azərbaycanın yaratdığı yeni reallıqlar artıq yalnız regionumuzda deyil, bütün dünyada qəbul olunur. Azərbaycan bu gün qlobal proseslərin sadəcə iştirakçısı deyil, həm də bir sıra proseslərin istiqamətinə və nəticələrinə təsir göstərə bilən ölkəyə çevrilib.
Prezident İlham Əliyevin uzaqgörən siyasəti nəticəsində Azərbaycanın yerləşdiyi coğrafiyanın strateji əhəmiyyəti dəfələrlə artıb. Ölkəmizin Şərqlə Qərb, Şimalla Cənub arasında yerləşməsi düzgün dövlət siyasəti nəticəsində böyük geoiqtisadi üstünlüyə çevrilib.
Bu gün Azərbaycan müstəqil xarici siyasət yürüdür və bu siyasətin əsas dayaqlarından biri də iqtisadi müstəqilliyimizdir. Güclü iqtisadiyyat bizə həm müstəqil qərarlar qəbul etmək, həm də milli maraqlarımızı daha qətiyyətlə müdafiə etmək imkanı verir.
Ölkəmizdə yaradılan Şərq-Qərb və Şimal-Cənub nəqliyyat dəhlizləri, Bakı-Tbilisi-Ceyhan neft kəməri, Cənub Qaz Dəhlizi, Transxəzər nəqliyyat-logistika imkanları və digər layihələr Azərbaycanı təkcə regionda deyil, qitələrarası nəqliyyat və enerji əlaqələrində mühüm mərkəzlərdən birinə çevirib.
Azərbaycanın sözünün imzası qədər möhkəm olması, verdiyi vədlərə sadiqliyi və tərəfdaşlarına etibarlı münasibəti ölkəmizin beynəlxalq nüfuzunu daha da artırıb. Bu gün Azərbaycan dünyanın aparıcı dövlətləri, o cümlədən ABŞ, Çin, Rusiya, Türkiyə, və s. ilə qarşılıqlı maraqlara əsaslanan strateji və tərəfdaşlıq münasibətlərini inkişaf etdirir.
Azərbaycanın etibarlı və nüfuzlu tərəfdaş kimi qəbul olunması ölkəmizin beynəlxalq və regional platformalarda iştirakının genişlənməsinə də imkan yaradır. Qoşulmama Hərəkatı, İqtisadi Əməkdaşlıq Təşkilatı, Türk Dövlətləri Təşkilatı, Şanxay Əməkdaşlıq Təşkilatı və digər beynəlxalq platformalarda Azərbaycanın mövqeyi və rolu getdikcə güclənir. Bu platformalarda ölkəmizin fəal iştirakı Azərbaycanın həm siyasi, həm də iqtisadi imkanlarının daha geniş coğrafiyada təqdim edilməsinə şərait yaradır.
Təbii ki, burada Prezident İlham Əliyevin dünya dövlətlərinin liderləri ilə qurduğu qarşılıqlı hörmətə və etimada əsaslanan münasibətlərin də xüsusi rolu var. Dövlət başçısının şəxsi diplomatik nüfuzu və müxtəlif ölkələrin liderləri ilə formalaşdırdığı münasibətlər Azərbaycanla həmin dövlətlər arasında əlaqələrin daha da möhkəmlənməsinə mühüm töhfə verir.
Bu gün Azərbaycan dünya dövlətləri sırasında özünəməxsus və hörmətli yerə malikdir. Ölkəmiz həm milli maraqlarını qoruyan, həm müstəqil siyasət yürüdən, həm də regional və qlobal əməkdaşlığa töhfə verən dövlət kimi tanınır.
Beləliklə, Prezident İlham Əliyevin rəhbərliyi altında Azərbaycanın qarşısında bundan sonra da daha böyük hədəflər dayanır. Yeni dünya nizamının formalaşdığı bir dövrdə Azərbaycan yalnız baş verən prosesləri izləyən deyil, həmin proseslərə təsir göstərən və öz milli maraqları doğrultusunda yeni imkanlar yaradan dövlət kimi mövqeyini daha da möhkəmləndirəcək.
Ən əsası isə budur ki, Azərbaycan artıq öz gücünə, siyasi iradəsinə və milli potensialına söykənən, beynəlxalq münasibətlər sistemində etibarlı tərəfdaş kimi qəbul olunan və yeni dünya düzəninin formalaşmasına öz töhfəsini verən orta güc dövlət kimi mövqeyini getdikcə daha da gücləndirir.

Ağarəhim Baxışov - Dövlət İdarəçilik Akademiyası

Telegramda izləyin