İz qoymaq üçün tarixin izini silənlər: Şuşanın təbii irsi üçün hansı risklər yaranır?

Şuşada bəzi turistlərin qayaların üzərinə müxtəlif yazılar yazması həm təbiətə, həm də tarixi əhəmiyyət daşıyan məkanlara zərər vurulması ilə bağlı narahatlıq yaradıb. Qoruq İdarəsinin məlumatına görə, bu cür yazılar sonradan silinsə də, təmizləmə zamanı qayalara əlavə zərər dəyməsi mümkündür və belə hallar artıq təkrarlanır.

Bəs, turistlərin qayalar üzərinə yazılar yazması Şuşanın təbii və tarixi-mədəni irsi üçün hansı risklər yaradır və belə halların qarşısını almaq üçün nəzarət, cərimə və maarifləndirmə baxımından hansı tədbirlər gücləndirilməlidir?
Mövzu ilə bağlı Sonxeber.az-a açıqlama verən Azərbaycan Turizm Agentlikləri Assosiasiyasının Turistlərə Maarifləndirmə və Dəstək şöbəsinin rəhbəri, turizm eksperti Rəhman Quliyev bildirib ki, turistlərin Şuşada qayaların üzərinə müxtəlif yazılar yazması şəhərin təbii və mədəni irsinə ciddi zərər vura bilər:

"Belə müdaxilələr tarixi məkanların ilkin görünüşünü pozmaqla yanaşı, onların gələcək nəsillərə olduğu kimi ötürülməsinə mane olur. Qayaların səthinə həkk olunan yazıların təmizlənməsi isə bəzən əlavə zədələnmələrə səbəb ola və bərpa işlərini çətinləşdirə bilər. Bu cür halların qarşısının alınması üçün turizm obyektlərində maarifləndirici lövhələrin və xəbərdaredici nişanların yerləşdirilməsi vacibdir".

Ekspert bildirib ki, eyni zamanda, tarixi və təbii ərazilərdə nəzarət mexanizmləri gücləndirilməli, qaydaları pozan şəxslərə qarşı qanunvericiliyə uyğun tədbirlər görülməlidir:

"Turistlərə səfər zamanı tarixi abidələrə və təbiətə hörmətlə yanaşmağın vacibliyi həm bələdçilər, həm də turizm şirkətləri tərəfindən izah edilməlidir. Sosial şəbəkələr və media vasitəsilə aparılan maarifləndirici kampaniyalar da turistlərdə məsuliyyətli davranış vərdişlərinin formalaşmasına kömək edə bilər. Şuşanın zəngin tarixi və təbii irsinin qorunması həm dövlət qurumlarının, həm turizm sektorunun, həm də hər bir ziyarətçinin ortaq məsuliyyətidir".

Röyalə Xəyal

Telegramda izləyin