Azərbaycana daha çox xarici turist cəlb etmək üçün hansı addımlar atılmalıdır? - AÇIQLAMA

Azərbaycan vətəndaşları üçün vizasız səfər imkanlarının genişlənməsi xaricə səyahətlərin daha əlçatan və rahat olmasına şərait yarada bilər. Viza prosedurlarının aradan qalxması və ya sadələşdirilməsi səyahət planlaşdırılmasını asanlaşdırmaqla yanaşı, turistlərin yeni istiqamətlərə marağını da artıra bilər. Bu baxımdan, vizasız rejimlərin genişlənməsinin Azərbaycandan xaricə turist axınına təsiri də diqqət çəkən məsələlərdəndir.

Bəs, Azərbaycan vətəndaşları üçün vizasız səfər imkanlarının genişlənməsi xaricə səyahətlərin sayına və turistlərin istiqamət seçimlərinə necə təsir göstərə bilər və vizasız rejimlərin artması Azərbaycandan xaricə turist axınının yüksəlməsinə nə dərəcədə səbəb ola bilər?
Mövzu ilə bağlı Sonxeber.az-a açıqlama verən turizm eksperti Rəhman Quliyev bildirib ki, Azərbaycana daha çox xarici turist cəlb etmək üçün ilk növbədə ölkənin turizm potensialının beynəlxalq bazarlarda daha məqsədyönlü və sistemli şəkildə tanıdılması vacibdir.

"Azərbaycan yalnız Bakı ilə deyil, Qarabağ və Şərqi Zəngəzur, Qəbələ, Şəki-Zaqatala, Quba-Xaçmaz, Lənkəran-Astara, Naxçıvan və digər regionların fərqli turizm imkanları ilə təqdim olunmalıdır. Bunun üçün rəqəmsal marketinq, beynəlxalq sərgilər, xarici media və influenserlərlə əməkdaşlıq, eləcə də konkret ölkələrin turist zövqünə uyğun reklam kampaniyaları genişləndirilməlidir.
Digər mühüm məsələ nəqliyyat əlçatanlığıdır. Birbaşa aviareyslərin sayının artırılması, yeni istiqamətlərin açılması və hava nəqliyyatında rəqabətin gücləndirilməsi turist axınına birbaşa təsir göstərə bilər. Turist üçün yalnız uçuşun mövcudluğu deyil, bilet qiymətinin münasib olması və səfərin ümumi xərclərinin rəqabətqabiliyyətli səviyyədə saxlanılması da əhəmiyyətlidir".

Ekspert bildirib ki, xidmət keyfiyyətinin yüksəldilməsi isə turizm strategiyasının əsas istiqamətlərindən biri olmalıdır:

"Otel, restoran, nəqliyyat, bələdçilik və digər xidmət sahələrində peşəkarlığın artırılması, xarici dil biliklərinin genişləndirilməsi və turist məmnuniyyətinin davamlı ölçülməsi vacibdir. Turistlərin yalnız Bakıda qalmasının qarşısını almaq üçün Bakı ilə regionlar arasında vahid turizm marşrutları və kombinə edilmiş paketlər hazırlanmalıdır. Məsələn, xarici turistə "Bakı-Şəki-Qəbələ", "Bakı-Qarabağ-Şərqi Zəngəzur", "Bakı-Lənkəran-Astara" kimi müxtəlif konsepsiyalarda hazır səyahət məhsulları təqdim etmək mümkündür.
Regionlarda turizm infrastrukturunun, xüsusilə yol, nəqliyyat, hotellər, restoranlar, istirahət və əyləncə obyektlərinin inkişafı da paralel aparılmalıdır. Eyni zamanda regionların özünəməxsus mətbəxi, təbiəti, tarixi-mədəni irsi, ekoturizm və kənd turizmi imkanları beynəlxalq auditoriyaya daha aktiv təqdim edilməlidir".

Onun sözlərinə görə, əsas məqsəd sadəcə turist sayını artırmaq deyil, turistin Azərbaycanda daha uzun müddət qalmasına və daha çox regionu ziyarət etməsinə nail olmaqdır. Bunun üçün "Azərbaycan - bir şəhər deyil, müxtəlif təcrübələrin ölkəsidir" yanaşması ilə vahid və rəqabətqabiliyyətli turizm məhsulu formalaşdırmaq lazımdır.

Röyalə Xəyal

Telegramda izləyin