Dağ-mədən sənayesinin inkişafı yeni istehsal müəssisələrinin yaradılmasına imkan verəcək

"Sentyabrın 22-də Azərbaycan Respublikasının Prezidenti İlham Əliyevin sədrliyi ilə "Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı"na həsr olunmuş müşavirənin keçirilməsi ölkənin sənaye siyasətinin yeni istiqamətlərinin müəyyənləşdirilməsi baxımından mühüm əhəmiyyət daşıyır.
Dövlət Proqramının əsas məqsədi dağ-mədən və metallurgiya sahələrinin inkişaf etdirilməsi, ölkənin mövcud mineral-xammal ehtiyatlarından daha səmərəli istifadə olunması, hasilat və emal proseslərinin təkmilləşdirilməsi, eləcə də bu sahələrdə müasir texnologiyaların tətbiqinin genişləndirilməsidir. Bu istiqamətdə həyata keçiriləcək tədbirlər yalnız mədən sənayesinin deyil, onunla əlaqəli digər istehsal sahələrinin də inkişafına təkan verə bilər.
Azərbaycanın müxtəlif regionlarında mövcud olan filiz yataqları ölkənin sənaye potensialının artırılması üçün mühüm resurs hesab olunur. Xüsusilə işğaldan azad olunmuş ərazilərdə yerləşən mineral ehtiyatların iqtisadi dövriyyəyə cəlb edilməsi həmin ərazilərin bərpası və sosial-iqtisadi inkişafı ilə yanaşı, ölkənin ümumi sənaye imkanlarının genişləndirilməsinə də şərait yarada bilər. Eyni zamanda, Filizçay yatağının potensialından istifadə və Naxçıvan Muxtar Respublikasının dağ-mədən imkanlarının qiymətləndirilməsi qarşıdakı dövrdə diqqət çəkən istiqamətlərdən biri ola bilər.
Dağ-mədən sənayesinin inkişafı yeni istehsal müəssisələrinin yaradılması, mövcud müəssisələrin modernləşdirilməsi, əlavə investisiyaların cəlb olunması və regionlarda yeni iş yerlərinin açılması baxımından da əhəmiyyətlidir. Xammalın yalnız hasil olunması deyil, onun ölkə daxilində emalının genişləndirilməsi əlavə dəyərin yaradılmasına, yerli məhsul istehsalının artmasına və sənaye zəncirinin formalaşmasına imkan verə bilər.
Metallurgiya sənayesinin inkişafı həmçinin Azərbaycanın qeyri-neft sektorunun gücləndirilməsi və iqtisadiyyatın şaxələndirilməsi baxımından xüsusi əhəmiyyət daşıyır. Müasir texnologiyaların tətbiqi, istehsal proseslərinin rəqəmsallaşdırılması və beynəlxalq standartlara uyğun məhsulların istehsalı ölkənin daxili bazarın tələbatının ödənilməsi ilə yanaşı, ixrac imkanlarının genişləndirilməsinə də xidmət edə bilər.
Dövlət Proqramının 2027-2030-cu illəri əhatə etməsi isə qarşıdakı dövr üçün ardıcıl və sistemli fəaliyyət istiqamətlərinin müəyyənləşdirilməsinə imkan yaradır. Proqram çərçivəsində nəzərdə tutulan layihələrin mərhələli şəkildə həyata keçirilməsi dağ-mədən və metallurgiya sənayesində yeni istehsal imkanlarının formalaşmasına, regionların iqtisadi fəallığının artmasına və sənaye potensialının daha səmərəli istifadəsinə şərait yarada bilər.
Ümumilikdə, dağ-mədən və metallurgiya sənayesinin inkişafına yönələn bu siyasət Azərbaycanın sənaye strukturunda qeyri-neft sektorunun payının artırılması, yerli xammal bazasından daha səmərəli istifadə edilməsi və iqtisadiyyatın uzunmüddətli dayanıqlığının təmin olunması baxımından mühüm istiqamətlərdən biri kimi qiymətləndirilə bilər.

Altay Əliyev - Şəhid ailələri, əlillər və müharibə veteranlarının müdafiəsi İctimai Birliyinin fəxri üzvü

Telegramda izləyin