ABŞ Yaxın Şərqə üçüncü təyyarədaşıyan gəmini göndərir

ABŞ İranla bağlı hərbi qüvvələrini artırır.

Sonxeber.az Reuters-ə istinadən xəbər verir ki, ABŞ ordusu USS Theodore Roosevelt təyyarədaşıyan gəmisinin rəhbərlik etdiyi zərbə qrupunu və USS Makin Island amfibiya qrupunu Yaxın Şərqə göndərir. Bu qüvvələrdə ümumilikdə təxminən 9 min hərbçi var. Gəlişdən sonra bölgədə ABŞ-ın üç təyyarədaşıyan gəmisinin olması gözlənilir. ABŞ Prezidenti Donald Tramp isə İranla bağlı yeni zərbələrin mümkün olduğunu bildirib. O, İranın son sülh təklifini kifayət hesab etmədiyini deyib və noyabr seçkilərindən sonra bombardmanların yenidən artırıla biləcəyini istisna etməyib.

İran da daha geniş cavaba hazırlaşır

Reuters-in 1 oktyabr məlumatına görə, İran ABŞ-ın genişmiqyaslı hücumları bərpa edəcəyi təqdirdə daha geniş və güclü cavab zərbələrinə hazırlaşır. Tehran eyni zamanda diplomatik kanalları tam bağlamadığını bildirir. İranın təklifində sanksiyaların aradan qaldırılması və dondurulmuş vəsaitlərin açılması kimi məsələlər yer alıb.

Hörmüz boğazında vəziyyət gərginləşir

Bu gün yayılan məlumata görə, 2,5 milyon barel neft daşıyan supertanker Hörmüz boğazından keçərkən naməlum mərmi ilə vurulub və yanğın baş verib. Hadisənin kim tərəfindən törədildiyi hələ müəyyən edilməyib. Gərginlik enerji bazarına da təsir edib: Brent neftinin qiyməti 2 oktyabr səhəri 102 dollardan yuxarı qalxıb.

Müəllif: İlkin Məmmədkərimov

Telegramda izləyin